ऑस्ट्रेलियात सुरू असलेल्या २१व्या राष्ट्रकुल क्रीडा स्पर्धेत दिवसागणिक भारताची कामगिरी उंचावत असून स्पर्धेच्या तिसऱ्या दिवशी भारतानं आणखी एका सुवर्णपदकावर नाव कोरलं आहे. वेटलिफ्टर सतीश शिवलिंगम यानं पुरुषांच्या ७७ वजनी गटात सर्वाधिक वजन उचलण्याची किमया केली आहे. सतीशच्या कामगिरीमुळं भारताच्या खात्यातील पदकांचा आकडा पाचवर गेला आहे. विशेष म्हणजे ही पाचही पदके वेटलिफ्टिंमध्ये मिळाली आहेत.
वेटलिफ्टिंगच्या स्नॅच प्रकारातील पहिल्या प्रयत्नात सतीशनं १३६ किलो वजन उचललं. दुसऱ्या प्रयत्नात १४० व तिसऱ्या प्रयत्नात १४४ किलो वजन उचललं. तर, क्लीन अँड जर्क प्रकारात १७३ किलो वजन उचलत सतीशनं त्याचा आकडा ३१७वर नेऊन ठेवला. सतीशचा निकटचा प्रतिस्पर्धी इंग्लंडच्या जॅक ऑलिव्हरनं रौप्य पदक पटकावलं. त्यानं एकूण ३१२ किलो वजन उचललं. ऑस्ट्रेलियाच्या फ्रान्सिस इताउन्दी याला कांस्य पदकावर समाधान मानावं लागलं. त्यानं एकूण ३०५ किलो वजन उचललं.
सतीश कुमार शिवलिंगम यानं २०१४च्या राष्ट्रकुल स्पर्धांमध्येही अशीच ‘सोनेरी’ कामगिरी केली होती. स्नॅच प्रकारात १४९ किलो वजन उचलत त्यानं त्यावेळी राष्ट्रकुल वेटलिफ्टिंगमध्ये नवा विक्रम रचला होता. याशिवाय, २०१७च्या राष्ट्रकुल चॅम्पियनशिप स्पर्धेतही त्यानं सुवर्ण पदक पटकावलं होतं. २०१६ साली झालेल्या रिओ ऑलिम्पिकसाठीही तो पात्र ठरला होता. तिथंही त्यानं चागंल उत्तम कामगिरी केली होती. मात्र, पदक मिळविण्यात तो अपयशी ठरला होता.
