अंबरनाथमध्ये कारच्या गॅरेजला भीषण आग; ८ ते १० गाड्या आगीच्या भक्षस्थानी, जाणीवपूर्वक आग लावल्याचा गॅरेज मालकाचा संशय
हिरामण गोरेगावकर
1 मार्च 2023
अंबरनाथमध्ये एका कारच्या गॅरेजला आज (१ मर्च) सकाळच्या सुमारास भीषण आग लागल्याची घटना घडली आहे. या आगीत गॅरेज संपूर्णपणे जळून खाक झालं असून गॅरेजमधील ८ ते १० गाड्या आगीच्या भक्ष्यस्थानी पडल्या आहेत.
अंबरनाथमधून बदलापूरकडे जाणाऱ्या मुख्य महामार्गाला लागून चिखलोली डीमार्टच्या जवळ ऑटोक्राफ्ट नावाचं कारचं गॅरेज आहे. या गॅरेजला आज सकाळी ७ वाजताच्या सुमारास अचानक आग लागली. यावेळी तिथे उपस्थित कर्मचाऱ्यांनी फायर एक्सटिंग्विशरच्या मदतीने ही आग विझवण्याचा प्रयत्न केला.
मात्र, गॅरेजमधील सीएनजी गाड्यांचे स्फोट होऊ लागल्यामुळे ही आग आटोक्याबाहेर गेली आणि काही वेळातच आगीने रौद्ररूप धारण केलं. या आगीत हे गॅरेज संपूर्णपणे जळून खाक झालंय. तर गॅरेजमध्ये दुरुस्तीसाठी आलेल्या ११ गाड्यांपैकी जवळपास ८ ते १० गाड्या आगीच्या भक्ष्यस्थानी पडल्या आहेत.
या आगीची माहिती मिळताच अंबरनाथ बदलापूर यासह एमआयडीसी अग्निशमन दलाने घटनास्थळी धाव घेतली. अग्निशमन दलाच्या ५ गाड्यांच्या सहाय्याने तब्बल दीड तासांच्या अथक प्रयत्नांनंतर ही आग आटोक्यात आणण्यात अग्निशमन दलाच्या जवानांना यश आलं. या आगीत जीवितहानी झालेली नसली, तरी मोठ्या प्रमाणात वित्तहानी झाली आहे.
दरम्यान, ही आग शॉर्टसर्किटमुळे लागलेली नसून कुणीतरी जाणीवपूर्वक लावली असल्याचा संशय गॅरेजच्या मालकांनी व्यक्त केल्याची माहिती दिली आहे.
