लग्न समारंभातून परतणाऱ्या कारचा टायर फुटला…आणि कुटुंबावर पडला काळाचा घाला
त्रिशा राऊत
नागपूर ग्रामीण प्रतिनिधी
मो 9096817953
नागपूर(ग्रामीण): लग्न समारंभावरून परतणाऱ्या कारचा मागचा टायर फुटला आणि भरधाव वेगात असलेली कार अनियंत्रित होऊन रस्त्यावर उलटली. यामध्ये वृद्ध आईचा मृत्यू झाला, तर मुलगा आणि सून गंभीर जखमी झाले.मात्र, कार चालक थोडक्यात बचावला. ही घटना सोमवारी दुपारी अडीचच्या सुमारास चिमूर-उमरेड रस्त्यावर उमरी फाटा परिसरात घडली.
सत्यभामा बाळकृष्ण जिलपे (75) असे मृत आईचे नाव असून गंभीर जखमींमध्ये त्यांचा मुलगा भोजराज बाळकृष्ण जिलपे (52) आणि सून सुनीता भोजराज जिलपे (48) यांचा समावेश आहे. हे तिघेही कुही येथील रहिवासी आहेत. पिंपळनेरी, जिल्हा चंद्रपूर येथील राजूरकर कुटुंबातील एका विवाह सोहळ्यासाठी चिमूर येथे गेले होते. लग्नानंतर तिघेही चिमूरहून उमरेडेमार्गे एमएच-४०/सीएच-३४४६ क्रमांकाच्या कारने कुहीकडे येऊ लागले.
पिंपळनेरीजवळ उमरी फाटा परिसरात आले असता त्यांच्या कारचा मागचा डावा टायर फुटला आणि भरधाव वेगात असलेल्या कारचे नियंत्रण सुटले. रस्त्यावर दोन वेळा कार उलटल्याने कारमधील तिघेही गंभीर जखमी झाले. काही वेळातच सत्यभामाचा जागीच मृत्यू झाला. माहिती मिळताच चिमूर पोलिसांनी घटनास्थळ गाठून सत्यभामाचा मृतदेह ताब्यात घेऊन शवविच्छेदनासाठी नेला, तरभोजराज व सुनिता यांना चिमूरच्या उपजिल्हा रुग्णालयात उपचारासाठी नेण्यात आले. मात्र कार चालकाला गंभीर दुखापत झाली नाही.याप्रकरणी चिमूर पोलिसांनी नोंद केली असून पोलीस निरीक्षक मनोज गभणे तपास करत आहेत.
