आई वडिलांनी उसाच्या फडात कष्ट केलं, ऊस तोडून शिकवलं, लेकींनी कष्टाचं पांग फेडलं, तिन्ही बहिणी पोलीस दलात रुजू
जितेंद्र कोळी
पारोळा तालुका प्रतिनिधी
मो: 9284342632
बीड (परळी)- तिन्ही लेकी पोलीस दलात गावकऱ्यांकडून सत्कार बीड जिल्ह्यातील परळी पासून जवळच असलेल्या सेलू तांडा येथील ऊसतोड कामगार म्हणून काम करणाऱ्या मारुती जाधव यांच्या तीन मुली पोलीस दलात पोलीस कॉन्स्टेबल म्हणून भरती झाल्या आहेत. त्यांच्या या कर्तुत्वाने ऊस तोडणी काम करणाऱ्या आई-वडिलांची मान उंचावली आहे. या तिन्ही बहिणींचे सर्वत्र कौतुक केले जात आहे.सोनाली, शक्ती आणि लक्ष्मी अशी त्यांची नावं आहेत.
– आई वडिलांच्या कष्टाचं पांग फेडलं
अथक मेहनत परिश्रम आणि मुलींना जर घरच्यांची साथ असेल तर मुली कोणतंही शिखर गाठू शकतात, हेच बीड जिल्ह्यातील परळी तालुक्यात असलेल्या सेलू तांडा येथील तीन सख्ख्या बहिणींनी दाखवलं आहे. सेलू तांडा येथील मारुती जाधव हे ऊसतोड कामगार म्हणून सुरुवातीला काम करत होते. काही वर्षानंतर त्यांनी ऊसतोड मुकादम म्हणून काम करण्यास सुरुवात केली.
– गावातील महिलांकडून सत्कार
मारुती जाधव यांना गावात त्यांना जमीन नाही आणि कोणती संपत्ती ही नाही मात्र, मारुती जाधव यांना आपलं मोठं कुटुंब हे जगवणं गरजेचं होतं. पाच मुली आणि दोन मुले असं त्यांचं कुटुंब मोठं आहे . यामुळे कष्ट करण्याशिवाय त्यांच्यासमोर पर्याय नव्हता. त्यांनी कष्ट करुन मुलींना शिकवलं. मुलींच्या यशाबद्दल गावातील महिलांनी त्यांचा सत्कार केला,
– मुलींनी आई वडिलांच्या कष्टाचं सोनं केलं
घरची आर्थिक परिस्थिती बिकट असताना त्यांनी आपल्या तिन्ही मुलींना शिकवण्यासाठी अथक मेहनत घेतली. जाधव पती-पत्नी आपल्या लेकींना शिक्षणासाठी पाठिंबा देत राहिले. आई-वडिलांच्या कष्टाचे त्यांच्या मुलींनी सोनं केले आहे.
– गावकऱ्यांकडून तिघींचा सत्कार
मारुती जाधव यांची मोठी मुलगी सोनाली ही करोनाच्या काळात पोलीस भरतीमध्ये सिलेक्ट झाली होती तर दुसऱ्या दोन मुली शक्ती आणि लक्ष्मी या नुकत्याच झालेल्या पोलीस भरतीमध्ये यशस्वी झाल्या आहेत. ग्रामपंचायतीतर्फे तिघींच्या सत्काराचं आयोजन करण्यात आलं होतं.
– तिन्ही बहिणींचं यश प्रेरणादायी
तिन्ही बहिणी गेल्या चार वर्षापासून पोलीस भरतीसाठी कसून सराव करीत होत्या एकाच कुटुंबातील तीन सख्ख्या बहिणी पोलीस दलात सेवेत दाखल होणे ही बहुतेक बीडमधील पहिली घटना असावी. सोनाली, शक्ती आणि लक्ष्मी या बहिणींनी इतरांपुढे एक मोठी प्रेरणा ठेवली आहे.
– गावातील मुलींसाठी प्रेरणा
मेहनत, जिद्द आणि चिकाटी आणि घरच्यांचा पाठिंबा असेल तर स्त्री यशाचं शिखर पार करु शकते. हे त्यांनी सिद्ध करून दाखवलं आहे. यामुळेच सेलू तांडा येथील गावकऱ्यांनी त्यांचे मोठ्या उत्साहात स्वागत करत अभिनंदन केलं आहे. तिन्ही बहिणींचं यश गावकऱ्यांसाठी आणि गावातील मुलींसाठी प्रेरणादायी ठरलंय.
