जग्गी वासुदेव यांनी केला छत्रपती शिवाजी महाराजांचा भयंकर अपमान, जितेंद्र आव्हाड यांनी दिला कारवाई करण्याचा इशारा..
मीडियावार्ता
६ मे,मुंबई: जग्गी वासुदेव यांनी आपल्या एक व्हिडिओमधून छत्रपती शिवाजी महाराज यांच्याबद्दल आक्षेपार्ह विधान करून महाराजांचा अपमान केल्याचे समोर आले आहे. या बाबतीत जितेंद्र आव्हाड यांनी ट्विटरद्वारे वाचा फोडून जग्गी वासुदेव यांच्यावर कारवाई करण्याचे आवाहन केले आहे
ट्विटरवर जितेंद्र आव्हाड म्हणाले की, जग्गी वासुदेव याने छत्रपती शिवाजीराजांविषयी एक खोटी कथा (आणि अँनिमेशन) प्रसारित केली आहे ज्यानुसार रामदास हा शिवाजींचा गुरु होता; रामदासाला भिक्षा मागताना पाहून शिवाजींनी स्वतःचे राज्य आणि स्वतःला रामदासांच्या चरणी अर्पण केले; रामदासाच्या आदेशाने शिवाजी राज्य सोडून हाती कटोरा घेवून भिक्षा मागू लागले; पुढे रामदासाने स्वतःच्या अंगावरील भगवे वस्त्र शिवाजींना देवून त्याला राज्याचा झेंडा म्हणून वापरायला सांगितले आणि ते राज्य शिवाजींचे नाही हे ध्यानी ठेवत राज्य करायला सांगितले.
ते पुढे म्हणाले की, छत्रपती शिवाजीराजांबद्दल अशी हिणकस आणि खोटी माहिती वारंवार प्रसारित केली जाते आणि त्यांचा व महाराष्ट्राचा अपमान केला जातो. महाराष्ट्र हा अपमान सहन करणार नाही. राज्य सरकारला याबाबतीत कडक कायदेशीर कारवाई करावी लागेल अन्यथा याने जनक्षोभ उसळेल!
