मनपा पोटनिवडणूक: सर्व पक्षांनी गड राखले

मुंबई: राज्यातील सहा महापालिकांतील पोटनिवडणुकांचे निकाल जाहीर झाले असून सर्वच पक्षांनी आपापल्या जागा राखल्या आहेत. मुंबई, नाशिकमधील गड अनुक्रमे शिवसेना, मनसेनं राखले. सोलापूर, नगरमध्ये काँग्रेसनं तर, पुणे, उल्हासनगरमध्ये राष्ट्रवादीनं विजय मिळवत आपली ताकद कायम असल्याचं दाखवून दिलं. प्रतिस्पर्धी पक्षांच्या जागा खेचून घेण्यासाठी प्रतिष्ठा पणाला लावणाऱ्या भाजपच्या हाती काहीच लागले नाही.

मुंबईत सेनाच

मुंबईत प्रतीक्षानगर, शीव येथील प्रभाग क्र. १७३ मध्ये शिवसेनेचे उमेदवार रामदास कांबळे ८४५ मतांनी निवडून आले. प्रतिस्पर्धी उमेदवार काँग्रेसचे सुनील शेट्ये यांना ५,७७१ मते मिळाली, तर कांबळे यांना ६,६१६ मतं मिळाली. शिवसेनेचे प्रल्हाद ठोंबरे यांच्या निधनामुळे ही जागा रिक्त झाली होती. येथे भाजपने शिवसेनेला पाठिंबा दिला होता.

उल्हासनगरमध्ये भाजपचा निसटता पराभव

उल्हासनगरमध्ये राष्ट्रवादी काँग्रेसच्या सुमन सचदेव विजयी झाल्या आहेत. त्यांना २,६९० मते मिळाली तर भाजपच्या उमेदवार साक्षी पमनानी यांना २,४८७ मते मिळाली. उल्हासनगर मनपाच्या १७ ब या पॅनलमधील राष्ट्रवादीच्या नगरसेविका पूजा कोर लबाना यांचे जात प्रमाणपत्र अवैध ठरल्यामुळं त्यांचे नगरसेवकपद रद्द झाले होते. त्या जागेवर ही पोटनिवडणूक झाली.

नाशिकमध्ये मनसे

नाशिक महानगरपालिका पोटनिवडणुकीत मनसेच्या उमेदवार अॅड. वैशाली भोसले विजयी झाल्या आहेत. भोसले यांना ७,४९० मते मिळाली. येथे शिवसेना दुसऱ्या तर, सत्ताधारी भाजप तिसऱ्या स्थानावर फेकली गेली.

पुण्यात राष्ट्रवादीचा विजय

पुणे महापालिकेचा मुंढवा वानवडी प्रभाग राष्ट्रवादीनं राखला आहे. इथं राष्ट्रवादी काँग्रेसच्या पूजा कोद्रे यांचा ३,५०० मतांनी दणदणीत विजय झाला. माजी महापौर चंचला कोद्रे यांच्या निधनामुळे ही जागा रिक्त झाली होती.

सोलापुरात एमआयएमचे प्रयत्न तोकडे

सोलापूरमध्ये काँग्रेसचे नगरसेवक रफिक हत्तुरे यांच्या निधनामुळे रिक्त झालेल्या जागेवर पोटनिवडणूक झाली. ही जागा काँग्रेसनं पुन्हा पटकावली. इथं काँग्रेसचे तौफिक हत्तुरे ४,९४४ मते घेऊन निवडून आले. एमआयएमचे पीर अहमद शेख यांना ३,३४० मते मिळाली. एमआयएमने ही जागा जिंकण्यासाठी शर्थीचे प्रयत्न केले होते. मात्र, ते निष्फळ ठरले.

अहमदनगरमध्ये काँग्रेस विजयी

अहमदनगरमध्ये केडगाव वॉर्ड क्र.३२ च्या पोटनिवडणुकीत काँग्रेसचे विशाल कोतकर विजयी झालेत. काँग्रेसचे माजी महापौर संदीप कोतकर यांना खूनप्रकरणी जन्मठेप झाल्याने त्यांचे नगरसेवकपद रद्द झाले होते. त्यांच्या रिक्त जागेसाठी ही निवडणूक झाली.