*मालमत्ता मिळकत पत्रिकेच्या वितरणासाठी सूचना जारी*
*जनतेची फसवणूक करणा-यांवर कठोर कार्यवाही:जिल्हाधिकारी शैलेश नवाल*
*नागरिकांच्या सुविधेसाठी http://aapleabhilekh.mahabhumi.gov.in/DSLR/propertycard संकेतस्थळ उपलब्ध*
*जनतेची फसवणूक करणा-यांवर कठोर कार्यवाही:जिल्हाधिकारी शैलेश नवाल*
*नागरिकांच्या सुविधेसाठी http://aapleabhilekh.mahabhumi.gov.in/DSLR/propertycard संकेतस्थळ उपलब्ध*
✍ मनोज खोब्रागडे✍
विदर्भ ब्युरो चीफ प्रतिनिधी
मिडीया वार्ता न्यु-8208266961
अमरावती : -उपअधीक्षक भूमी अभिलेख अंतर्गत येणाऱ्या जिल्ह्यातील नझुल शीट प्लॉटबाबत होणारे फेरफार, फेरफार झाल्यानंतर मिळकत पत्रिका तयार करणे, मिळकत पत्रिका वितरण करणे, मिळकत पत्रिके करीता आकारण्यात येत असलेले शासकीय शुल्क, फेरफार करतांना संबंधित पक्षकारांना कोणतीही सुचना न देता फेरफार प्रमाणित करणे, बनावट आखीव पत्रिका तयार करुन वितरीत करणे, तसेच आकारण्यात येणारे शुल्क चलानद्वारे शासकीय खजिन्यात जमा न करता अपहार करणे आणि नियमबाह्य कामकाज होत असल्याबाबत अनेक तक्रारी प्रशासनाला प्राप्त झाल्या आहेत. अश्या प्रकरणांपासून जनतेची फसवणूक टाळण्यासाठी मालमत्ता मिळकत पत्रिकेचे वितरण ऑनलाईन पध्दतीने महाभुलेख या संकेतस्थळावरुन करण्यात यावे, असे स्पष्ट निर्देश जिल्हाधिकारी शैलेश नवाल तथा पदसिध्द भूमी अभिलेख उपसंचालक शैलेश नवाल यांनी दिले आहे. यासंदर्भात त्यांनी विशेष सूचना निर्गमित केल्या.
नियमबाह्य कामकाज व अपहाराच्या घटना निदर्शनात आल्याच्या या पार्श्वभूमीवर उपअधीक्षक भूमी अभिलेख कार्यालयातील कर्मचारी स्वप्नील उंबरकर व योगेश शिरभाते यांच्यावर फौजदारी कार्यवाही करुन गुन्हा दाखल करण्यात आला आहे. स्वप्नील उंबरकर व योगेश शिरभाते तसेच मुख्य सहाय्यक अविनाश दशरथकर यांचे निलंबन करण्यात आले आहे. तसेच श्रीमती शिरस्तेदार अर्चना चव्हाण यांची विभागीय चौकशी सुरु करण्यात आलेली आहे. तर भूमापक कु. जे. एस. दुबळे यांच्यावर निलंबनाची कार्यवाही प्रस्तावित केलेली आहे.
जनतेची फसवणूक टाळण्याकरीता तसेच मालमत्ता मिळकत पत्रिकेचे सुरळीत वितरण होण्यासाठी पुढीलप्रमाणे सूचना निर्गमित करण्यात आल्या आहेत. उपअधिक्षक भुमी अभिलेख अमरावती यांनी मालमत्ता मिळकत पत्रिकेचे वाटप हे सर्व ऑनलॉईन पध्दतीने महाभुलेख संकेतस्थळवरुन करावे. ज्या मिळकत पत्रिका ऑनलॉईन झालेल्या नसतील अशा मिळकत पत्रिकाची नागरीकांकडून मागणी झाल्यास उपअधिक्षक भूमी अभिलेख कार्यालय यांनी तात्काळ नियमानुसार मिळकत पत्रिका ऑनलॉईन करुन महाभुलेख संकेतस्थळावरुन निर्गमित करावे. कोणत्याही परिस्थितीत ऑफलॉईन मिळकत पत्रिका वितरीत करण्यात येवु नये, अशा सूचना जिल्हाधिकाऱ्यांनी संबंधित विभागाला दिल्या आहेत.
नागरिकांना मिळकत पत्रिका ही http://aapleabhilekh.mahabhumi.gov.in/DSLR/propertycard या संकेतस्थळावर उपलब्ध होणार असून ऑनलाईन चलनाव्दारे शासकीय शुल्क भरल्यावर पत्रिका प्राप्त होईल. महानगरपालिका क्षेत्राकरीता रु. 135, अ, ब, क वर्ग नगरपालीका, नगरपंचायत क्षेत्राकरीता रु.90 तर ग्रामीण क्षेत्रासाठी रु. 45 इतके शासकीय शुल्क भरून मिळकत पत्रिका मिळण्याची सोय उपलब्ध करुन देण्यात आलेली आहे. उपअधिक्षक (भुमीअभिलेख) कार्यालयामधून कोणत्याही मिळकत पत्रिकेचे वितरण करण्यात येणार नाही.
मिळकत पत्रिका ही सेतु केंद्र आपले सरकार सेवा केंद्र मधुन ऑनलॉईन पध्दतीने महाभुलेख संकेतस्थळवरुन वितरित करण्यात येईल. मिळकत पत्रिकेसाठी उपरोक्तप्रमाणे पत्रिका शुल्क व सेतु सुविधा शुल्क रु.25 प्रमाणे (मिळकत पत्रिकाचे एकूण ५ पानांपर्यंत) आकारण्यात येईल. व त्यापुढील प्रत्येक पानाकरीता दोन रुपये आकारुन नागरीकांना पत्रिका उपलब्ध करुन देण्यात याव्यात.
उपअधिक्षक भूमी अभिलेख कार्यालयामधुन ज्या मिळकत पत्रिका ऑनलाईन झालेली नसेल, अशा बाबतीत विशेष परिस्थितीमध्ये ऑफलाईन मिळकत पत्रिका वितरीत करणे आवश्यक असल्यास मूळ मिळकत पत्रिकेची छायांकीत साक्षांकीत प्रत सेतुमधून वरीलप्रमाणे शुल्कचा भरणा केल्यावर संबंधितांना वितरीत करावे. तसेच याबाबतची स्वतंत्र नोंदवही जतन करुन ठेवावी.
अद्यापपर्यंत ऑनलाईन न झालेल्या मिळकत पत्रिका 15 ऑगस्टपूर्वी ऑनलाईन करण्याची प्रक्रिया पूर्ण करुन तसा कार्यपूर्ती अहवाल सादर करण्याचे निर्देशही जिल्हाधिकाऱ्यांनी दिले आहे. नागरीकांनी मालमत्ता मिळकत पत्रिका महाभुलेख संकेतस्थळ तसेच सेतु केंद्रामार्फत प्राप्त कराव्यात अशा सूचना जिल्हाधिकारी तथा पदसिध्द उप संचालक (भुमी अभिलेख) शैलेश नवाल यांनी दिल्या आहेत.
