*मुंबईतील रुग्ण दुप्पट होण्याच्या कालावधीची ‘द्विशतकपूर्ती’*
*४ विभागात ३०० पेक्षा अधिक तर ११ विभागात २०० पेक्षा अधिक दिवसांचा रुग्ण दुप्पटीचा कालावधी*
*रुग्ण वाढीचा सरासरी दर देखील आता ०.३३ टक्क्यांपर्यंत खाली*
बृहन्मुंबई महापालिका क्षेत्रातील ‘कोविड – १९’ बाधित रुग्णांचे प्रमाण दुप्पट होण्याच्या सरासरी कालावधीने आता द्विशतक गाठले आहे. यातही ठळक वैशिष्ट्य म्हणजे महानगरपालिका क्षेत्रातील २४ विभागांपैकी ४ विभागांमध्ये ३०० पेक्षा अधिक दिवसांचा तर ११ विभागांनी २०० पेक्षा अधिक दिवसांचा रुग्ण दुप्पटीचा कालावधी गाठला आहे. एवढेच नव्हे तर रुग्ण वाढीचा साप्ताहिक सरासरी दर देखील आता घसरुन ०.३३ टक्क्यांपर्यंत खाली आला आहे.
बृहन्मुंबई महानगरपालिका क्षेत्रात कोरोना संसर्गाला प्रतिबंध करण्यासाठी बृहन्मुंबई महानगरपालिकेने केलेल्या उपाययोजना वाखाणण्याजोग्या ठरल्या आहेत. इतर शहरे, राज्यं एवढेच नव्हे तर इतर देशांनीही मुंबईचे ‘मॉडेल’ स्वीकारले आहे. जागतिक आरोग्य संघटना, जागतिक बँक यांनीही बृहन्मुंबई महानगरपालिकेच्या प्रयत्नांचे जाहीर कौतुक केले. असे असले तरी महानगरपालिका प्रशासनाने हुरळून न जाता कोविडला पूर्ण प्रतिबंध करण्यासाठी उपाययोजनांमध्ये अधिकाधिक वेग देताना ‘माझे कुटुंब-माझी जबाबदारी’ ही मोहीम अत्यंत प्रभावीपणे राबविली. मास्कचा नियमित उपयोग, हातांची वारंवार स्वच्छता राखणे व सुरक्षित अंतर या त्रिसूत्रीचे पालन प्रत्येक नागरिकाने करावे, यासाठी जनजागृती करुन भर देण्यात आला. मुंबई महानगरात घरोघरी जाऊन सर्वेक्षण करण्यात आले. या सर्व अथक प्रयत्नांचे प्रतिबिंब आता आकडेवारीतही उमटताना दिसत आहे.
रुग्ण दुप्पट होण्याचा कालावधी जितका जास्त तितका संक्रमणाचा वेग कमी असतो. ही बाब लक्षात घेता, बृहन्मुंबई महानगरपालिकेने दिनांक २१ ऑक्टोबर २०२० रोजी रुग्ण दुप्पटीचे शतक गाठले होते. तर दिनांक २९ ऑक्टोबर २०२० रोजी १५७ दिवसांचा टप्पा ओलांडला होता. त्यानंतर अवघ्या ८ दिवसांत म्हणजे दिनांक ५ नोव्हेंबर २०२० रोजी मुंबईचा रुग्ण दुप्पटीचा सरासरी कालावधी ५१ दिवसांनी वाढून २०८ दिवस इतका झाला आहे.
महानगरपालिकेच्या सर्व २४ प्रशासकीय विभागांचा विचार करता, रुग्ण दुप्पट होण्याच्या कालावधीमध्ये ४ विभागांनी ३०० दिवसांचा टप्पा गाठला आहे. यामध्ये ‘जी-उत्तर’ ३५१ दिवस, ‘एफ-दक्षिण’ ३१६ दिवस, ‘ए’ विभाग ३०८ दिवस आणि ‘सी’ विभाग ३०६ दिवस यांचा समावेश आहे.
तसेच, एकूण ११ विभागांनी २०० दिवसांपेक्षा जास्त रुग्ण दुप्पटीचा कालावधी गाठला आहे. त्यात ‘जी-दक्षिण’ विभाग २८३, ‘एल’ विभाग २४५, ‘ई’ विभाग २४२, ‘एस’ विभाग २३८, ‘डी’ विभाग २३३ दिवस, ‘एफ-उत्तर’ विभाग २१३ दिवस, ‘एम-पूर्व’ विभाग २०७ दिवस, ‘के-पूर्व’ विभाग २०७ दिवस, ‘एच-पश्चिम’ विभाग २०६ दिवस, ‘एच-पूर्व’ विभाग २०३ दिवस आणि ‘के-पश्चिम’ विभाग २०० दिवस यांचा समावेश आहे.
उर्वरित ९ विभागांमध्ये देखील रुग्ण दुप्पटीचा कालावधी हा १५० दिवसांपेक्षा जास्तच आहे.
रुग्ण दुप्पटीचा कालावधी वाढत असताना रुग्णसंख्या वाढीमध्ये देखील लक्षणीय घट नोंदविण्यात आली आहे. रुग्णसंख्या वाढीचा साप्ताहिक दर जितका कमी तेवढे संसर्गावर नियंत्रण अधिक मानले जाते. हे पाहता, २९ ऑक्टोबर २०२० रोजी असलेला ०.४४ टक्के इतका रुग्ण वाढीचा सरासरी दर आता ०.३३% इतका झाला आहे.
या संपूर्ण कामगिरीच्या निमित्ताने महानगरपालिका आयुक्त श्री. इकबाल सिंह चहल यांनी पुन्हा एकदा सर्व मुंबईकरांचे आभार मानले आहेत. मुंबई महानगरातील सर्व लोकप्रतिनिधींच्या मार्गदर्शनामुळे आणि मुंबईकरांच्या सहकार्यामुळेच कोविड प्रतिबंधात्मक उपाययोजना यशस्वी होत आहेत. बृहन्मुंबई महानगरपालिका क्षेत्रातून कोरोनाचे उच्चाटन करण्यासाठी मुंबईकरांचे सहकार्य महानगरपालिकेला निश्चितपणे मिळेल, असा विश्वासही यानिमित्ताने आयुक्तांनी पुन्हा एकदा व्यक्त केला आहे.
