बैलगाडी शर्यत परवानगीचे अधिकार संबंधित तालुक्याचे उपविभागीय अधिकारी यांना प्रदान
✍️सचिन पवार ✍️
कोकण ब्युरो चीफ
📞8080092301📞
रायगड :- शासन, कृषि, पशुसंवर्धन, दुग्धव्यवसाय विकास व मत्स्यव्यवसाय विभागाकडील अधिसूचनेव्दारे महाराष्ट्र प्राण्यांना क्रूरतेने वागवण्यास प्रतिबंध करण्याबाबत (बैलगाडी शर्यतीचे आयोजन) नियम, 2017 मधील नियम 4 (1) अन्वये शासनाने जिल्हाधिकारी यांना बैलगाडी शर्यतीचे आयोजित करण्याबाबत शासनाने अधिकार प्रदान केले आहेत.शासन, कृषि, पशुसंवर्धन, दुग्धव्यवसाय विकास व मत्स्यव्यवसाय विभागाकडील परिपत्रकान्वये “मा. सर्वोच्च न्यायालयाने दि.16/12/2021 रोजी दिलेल्या निर्णयानुसार घटनापीठाच्या अंतिम निर्णयाच्या अधिन राहून प्राण्यांना क्रूरतेने वागवण्यास प्रतिबंध करण्याबाबत (महाराष्ट्र सुधारणा) अधिनियम, 2017 मधील तरतुदी आणि महाराष्ट्र प्राण्यांना क्रूरतने वागविण्यास प्रतिबंध करण्याबाबत (बैलगाडी शर्यतीचे आयोजन) नियम, 2017 मध्ये विहीत करण्यात आलेल्या नियम व अटी शर्तीचे काटेकोरपणे पालन करुन, राज्यात बैलगाडी शर्यतीस परवानगी देण्यात येत आहे, असे आदेश दिले आहेत.
आयुक्त पशुसंवर्धन, महाराष्ट्र राज्य यांच्याकडील परिपत्रकान्वये राज्यातील बैलगाडी शर्यती आयोजित करण्याबाबत मार्गदर्शक सूचना (SOP) निर्गमित करण्यात आली आहे.महाराष्ट्रातील संस्कृती व परंपरेनुसार साजरे करण्यात येणाऱ्या यात्रा, जत्रा, उत्सव अशा प्रसंगी रायगड जिल्हयात बैलगाडी शर्यती परवानगी मिळणेबाबतचे अर्ज मोठया प्रमाणावर प्राप्त होत आहेत. हे अर्ज प्राप्त झालेनंतर 7 दिवसांचे आत बैलगाडी शर्यतीसाठी परवानगी देण्याबाबत नमूद आहे. तथापि जिल्हाधिकारी कार्यालयाकडे अर्जदारास आवश्यक त्या कागदपत्रांसह परिपूर्ण प्रस्ताव विहित मुदतीतसादर करणे, कागदपत्रांची/त्रुटींची पूर्तता करणे तसेच संबंधित विभागांचे अहवाल/अभिप्राय प्राप्त होणे यामध्ये बराच अवधी लागत असल्याने, महाराष्ट्र जमीन महसूल अधिनियम 1966 चे कलम 7 च्या पोट कलम (3) अन्वये, बैलगाडी शर्यतीस परवानगी देण्यासाठी प्रदान केलेले सर्व अधिकार, महाराष्ट्र जमीन महसूल अधिनियम 1966 चे कलम 9 अ व 330 अ मधील तरतूदीनुसार जिल्हाधिकारी रायगड डॉ.योगेश म्हसे यांनी रायगड जिल्हयातील उपविभागीय अधिकारी यांना त्यांच्या उपविभागाचे कार्यक्षेत्रामध्ये बैलगाडी शर्यतीस परवानगी देण्याचे अधिकार प्रदान केले आहेत.
जिल्हयातील सर्व संबंधित उपविभागीय अधिकारी यांनी बैलगाडी शर्यतीस परवानगी देतेवेळी मा. सर्वोच्च न्यायालयाने दिनांक दि.16/12/2021 व दि.08/05/2023 रोजी दिलेल्या निर्णयानुसार घटनापीठाच्या अंतिम निर्णयाच्या अधिन राहून तसेच कृषि, पशुसंवर्धन, दुग्धव्यवसाय विकास व मत्स्यव्यवसाय विभागाकडील अधिसुचना दि.10/11/2017 व आयुक्त पशुसंवर्धन, महाराष्ट्र राज्य यांचेकडील परिपत्रक दि.24/05/2023 अन्वये प्रसिध्द केलेल्या महाराष्ट्र क्रूरतेने वागवण्यास प्रतिबंध करण्याबाबत (वैलगाडी शर्यतीचे आयोजन) नियम 2017 मध्ये विहित करण्यात आलेल्या सूचना, नियम व अटी शर्तीचे पालन करुन, बैलगाडी, शर्यतीस परवानगी देणेची कार्यवाही करावी तसेच परवानगी देताना शासन, कृषि, पशुसंवर्धन, दुग्धव्यवसाय विकास व मत्स्यव्यवसाय विभागाकडून यांच्याकडून वेळोवेळी निर्गमित झालेल्या शासन अधिसूचना, शासन निर्णय, शासन परिपत्रक यामध्ये दिलेल्या अटी व शर्तीचे देखील काटेकोरपण पालन होईल याची दक्षता घ्यावी.
