आपण मागील लेखामध्ये ज्येष्ठांचे पडणं हा एक आजार असतो यावर सविस्तरपणे चर्चा केली. हार्टअटॅक केव्हाही येऊ शकतो, या अनिश्चिततेची भीती ज्येष्ठांना फार त्रास देते. त्याचप्रमाणे आपण केव्हाही पडू, कुठेही पडू, आपलं हाड तर मोडणार नाही ना, वगैरे प्रश्न मनाला भेडसावतात. ही भीती एवढी भयावह असते की ‘जावे त्याच्या वंशा तेव्हा कळे’.
अमेरिकेचे राष्ट्राध्यक्ष डोनाल्ड ट्रम्प यांना तोल जाऊन पडण्याची खूप भीती वाटते. विशेषत: पायऱ्या चढताना व उतरताना. त्यांचे वय ७१ आहे. ते प्रत्येक वेळेस जिन्याला लागून जो साइड बार असतो, त्याला धरूनच चढतात व उतरतात. ते पायऱ्या चढत असताना वा उतरत असताना त्यांचे अंगरक्षक त्यांच्या प्रत्येक हालचालीवर नजर ठेवून असतात. आपल्या बाबतीत आपल्या अंगाचे रक्षक आपणच! म्हणून आपण या कधीही व कुठल्याही ज्येष्ठाला ग्रासू शकणाऱ्या विचित्र भीतीबद्दल आणखी विचार करूया.
