ST च्या प्रवाशांसाठी गुड न्यूज! ५ हजारांहून अधिक नव्या कोऱ्या आणि चकाचक ई-बस दाखल होणार
✍🏻 *जितेंद्र कोळी* ✍🏻
*पारोळा तालुका प्रतिनिधी*
*संपर्क न.-9284342632*
*मुंबई*- एसटी महामंडळाच्या अनेक बस डिझेलवर धावत आहेत. शेकडो बसेसची अवस्था अत्यंत वाईट आहे. पावसात बस गळत असल्याचे व्हिडिओही व्हायरल झाले आहेत. पण आता एसटीचं रुपडं बदलणार आहे. एसटीच्या ताफ्यात नव्या कोऱ्या ५ हजारांहून अधिक ई बस येणार आहे.
एसटीच्या पाच हजारांहून अधिक ई-बसची प्रतीक्षा करणाऱ्या प्रवाशांसाठी दिलासादायक बातमी आहे. देशातील सार्वजनिक वाहतूक व्यवस्थेमध्ये दुसऱ्या क्रमांकाची सर्वात मोठी ई-बस निविदा प्रक्रिया महाराष्ट्र राज्य मार्ग परिवहन महामंडळ अर्थात एसटी महामंडळात पूर्ण झाली आहे. एसटीतील ५ हजार १५० ई-बस बांधणीसाठी ऑलेक्ट्रा कंपनीची निवड करण्यात आली आहे.
एसटीच्या ई-बस बांधणीसाठी दहा हजार कोटींचा खर्च अपेक्षित आहे. येत्या २४ महिन्यांत सर्व ई-बस महामंडळाच्या ताफ्यात दाखल होऊन राज्यात धावणार आहे.
शिंदे-फडणवीस सरकार स्थापन झाल्यानंतर मुख्यमंत्री एकनाथ शिंदे यांनी परिवहन मंत्री आणि एसटी महामंडळाच्या अध्यक्षपदाची सूत्रे हाती घेतली. एसटीच्या संचालक मंडळाच्या बैठकीत अध्यक्षपदी असताना मुख्यमंत्री शिंदे यांनी ५ हजार १५० ई-बस ताफ्यात दाखल करण्याच्या सूचना बैठकीत दिलेल्या आहेत. यानुसार महामंडळाकडून निविदा प्रक्रिया सुरू करण्यात आलेली आहे.
एसटीच्या ताफ्यात जीसीसी अर्थात प्रति किमी निश्चित रकमेच्या भाडेतत्वावर ई-बस ताफ्यात दाखल होणार आहेत. यात निविदा सादर करण्यासाठी ८ मे रोजी अंतिम मुदत होती. १० मे रोजी निविदा उघडण्यात आल्या आहेत. यात चार कंपन्यांनी सहभाग घेतला आहे. सार्वजनिक वाहतूक व्यवस्थेतील ई-बस बांधणीचा दांडगा अनुभव असलेल्या कंपन्यांचा यात समावेश होता.
ई-बस एसटीच्या स्वमालकीच्या नसल्याने कोणत्याही प्रकारचे भांडवल गुंतवण्याची एसटीला आवश्यकता नाही. चालक, यांत्रिक, बसची देखभाल, वीज खर्च आणि चार्जिंग स्टेशन या सर्व बाबींची पूर्तता कंत्राटदार करणार आहे. ई-शिवनेरी आणि ई-शिवाईला प्रवाशांचा उदंड प्रतिसाद लाभत असतानाच ई-बसचा मोठा ताफा एसटी महामंडळात समावेश करण्याच्या दृष्टीने आणखी एक पाऊल पडले आहे.
केंद्राच्या फेम-२ योजनेंतर्गत दिल्ली, बेंगळुरू, सूरत, कोलकाता आणि हैद्रराबाद या पाच शहरांसाठी ५ हजार ५८० ई-बससाठी कन्व्हर्जन्स एनर्जी सोल्यूशन्स लिमिटेडने निविदा प्रक्रिया सुरू केली आहे. पहिल्या क्रमांकाची निविदा आहे. दुसऱ्या क्रमांकाची निविदा एसटीची आहे, असा दावा
पर्यावरण पूरक आणि प्रदूषण कमी करणाऱ्या पाच हजारांहून अधिक बस एसटीच्या ताफ्यात दाखल होणार आहे. ई-बससाठी ५० ठिकाणी १२७ चार्जिंग स्टेशन उभारण्यात येणार आहेत.
– शेखर चन्ने, उपाध्यक्ष व व्यवस्थापकीय संचालक, एसटी महामंडळ
