माणगाव नागरिक सेवा फाउंडेशन तर्फे वडघर विद्यालयात विविध स्पर्धांचे पारितोषिक व वृक्षारोपण.
✍ भालचंद्र खाडे ✍
माणगांव शहर प्रतिनिधी
9049323836
माणगांव :- तारीख 8 ऑगस्ट छत्रपती शिक्षण मंडळ कल्याण संचालित सरस्वती विद्यामंदिर वडघर मुद्रे तथा कैलासवासी शंकर सिताराम देशमुख विद्या संकुल येथे कैलासवासी सुभाष देशमुख यांच्या द्वितीय पुण्यस्मरण दिनानिमित्त विविध स्पर्धा व वृक्षारोपण करण्यात आले.
या स्पर्धांचे आयोजन करून त्यांचे पारितोषिक वितरण शनिवार दिनांक 6 ऑगस्ट रोजी करण्यात आले. याप्रसंगी व्यासपीठावर संस्थेचे सल्लागार संजय गांधी, संस्थापक डॉक्टर दीपक देशमुख, संस्थेचे अध्यक्ष रत्नदीप आमरे,
सचिव भालचंद्र खाडे, बाबाजी रिकामे, पोलीस पाटील मनोहर धुमाळ, शाळेचे मुख्याध्यापक नागनाथ सुर्वे, सरपंचा पुष्पा साळवी आदी मान्यवर उपस्थित होते.
सदर कार्यक्रमात मान्यवरांच्या हस्ते प्रतिमापूजन, शारदा माता पूजन करून कार्यक्रमाची सुरुवात करण्यात आली. यावेळी डॉक्टर दीपक देशमुख यांनी मनोगत व्यक्त करून कै.सुभाष देशमुख यांच्या शिक्षण क्षेत्रातील योगदानाचे व सामाजिक कार्यकर्त्यांचे स्मरण केले.
कै. सुभाष देशमुख हे शिक्षण प्रेमी होते ,स्वतःची अभियांत्रिकी नोकरी सांभाळून उत्तरार्धात या पंचक्रोशीतील मुलांना दहावीपर्यंत शिक्षण घेता यावे म्हणून मोठ्या कष्टाने ही शाळा हे संकुल उभे केले, शाळेची गुणवत्ता टिकावी यासाठी त्यांनी जीवनाच्या शेवटपर्यंत लक्ष दिले. त्यांच्या या कार्याचे स्मरण करून त्यांना आदरांजली अर्पण केली. विद्यालयाचे मुख्याध्यापक नागनाथ सुर्वे यांनी ही आपले मनोगत व्यक्त करून आदरांजली अर्पण केली.
यावेळी हस्ताक्षर स्पर्धा ,सामान्य ज्ञान स्पर्धा, देशभक्तीपर गीत गायन स्पर्धा घेण्यात आल्या तसेच प्राविण्य प्राप्त विद्यार्थी बक्षिसे व इ.10 वी मध्ये शेकडा 75 % पर्यंत गुण प्राप्त विदयार्थी सत्कार समारंभ करण्यात आला.
या स्मृती प्रीत्यर्थ स्पर्धाचे बक्षीस वितरण करण्यात आले तसेच विद्यालयाच्या प्रांगणात मान्यवरांच्या हस्ते वृक्षारोपण करण्यात आले. कार्यक्रमाचे प्रास्ताविक शिक्षक राजन पाटील यांनी केले तर सूत्रसंचालन विद्या शिर्के, आभार प्रदर्शन सुरेश भेदाटे यांनी केले.
फोटो – वृक्षारोपण करताना मान्यवर.
