शिवसेना (उबाठा गट)चा रायगड जिल्हाधिकारी कार्यालयावर जनआक्रोश मोर्चा –
पोलिसांचे कडे तोडून आत घुसण्याचा प्रयत्न
अँड.रत्नाकर पाटील
रायगड ब्यूरो चीफ
९४२०३२५९९३
अलिबाग:- शिवसेना (उबाठा गट) तर्फे विविध स्थानिक प्रश्नांबाबत तीव्र नाराजी व्यक्त करत सोमवारी रायगड जिल्हाधिकारी कार्यालयावर जनआक्रोश मोर्चा काढण्यात आला. या मोर्चादरम्यान पोलिसांचे बॅरिकेड तोडून थेट जिल्हाधिकारी कार्यालयाच्या प्रवेशद्वारातून आत घुसण्याचा शिवसैनिकांनी प्रयत्न केला. जवळपास तास दीड तास पोलिस आणि शिवसैनिकांमध्ये शाब्दिक चकमक सुरू राहिली.
हा मोर्चा शिवसेना उपनेते बबनदादा पाटील यांच्या नेतृत्वाखाली काढण्यात आला. यावेळी जिल्हाप्रमुख माजी आमदार मनोहर भोईर, जिल्हाप्रमुख सुरेंद्र म्हात्रे, प्रसाद भोईर, दिपश्री पोटफोडे,शिल्पा घरत ,दर्शना जवके, शिरीष घरत ,नंदकुमार शिर्के,सतीश पाटील,प्रशांत मिसाळ,अविनाश म्हात्रे,यांसह अनेक पदाधिकारी व कार्यकर्ते उपस्थित होते. मोर्चाच्या मार्गावरून जाणाऱ्या रस्त्यावर खड्डे व चिखल साचल्याने शिवसैनिक संतप्त झाले होते.
मोर्चात सहभागी शिवसैनिकांनी सरकारविरोधी घोषणाबाजी करत स्थानिक समस्यांकडे शासनाचे लक्ष वेधले. जिल्हाधिकारी कार्यालयाच्या प्रवेशद्वारावर पोहोचल्यावर पोलिसांनी बॅरिकेड उभारून मोर्चा थांबवण्याचा प्रयत्न केला. मात्र संतप्त शिवसैनिकांनी पोलिसांचा कडे तोडून आत घुसण्याचा प्रयत्न केला, यामुळे काही काळ वातावरण तणावपूर्ण झाले.
शेवटी पोलिसांच्या मध्यस्थीने निवासी उपजिल्हाधिकारी संदेश शिर्के यांनी मोर्चाच्या पदाधिकाऱ्यांचे निवेदन स्वीकारले. समस्यांवर तातडीने तोडगा काढण्याची मागणी निवेदनातून करण्यात आली. मोर्चामुळे शहरातील वाहतूक काही काळ विस्कळीत झाली होती.
चौकट
प्रमुख मागण्या
गृहराज्यमंत्री योगेश कदम यांच्या मालकीच्या डान्स बारमधील बेकायदेशीर कृत्यांमुळे त्यांना तात्काळ मंत्रिमंडळातून काढावे.
MIDC, MMRDA व सार्वजनिक बांधकाम खात्यातील मागील सोळा वर्षांतील अनियमिततेबाबत CAGमार्फत विशेष ऑडिट करून चौकशी करावी.
कृषीमंत्री माणिकराव कोकाटे यांचा सभागृहातील पवित्रतेचा भंग आणि त्यांच्या जागी क्रीडामंत्री बनवण्याचा प्रयत्न रोखावा.
नाशिक येथील ‘हनिन ट्रॅप’ प्रकरणाची सखोल चौकशी करून सर्व दोषींवर कारवाई करावी.
‘वोट चोरी’ प्रकरणातील आरोपींवर निवडणूक आयोगाने तत्काळ चौकशी करून कारवाई करावी.
गृहनिर्माण मंत्री प्रा. संजय सरनाईक यांच्या ‘पीडीडी’ प्रकरणाची चौकशी करून दोषींवर कडक कारवाई करावी.
राज्यातील लाडक्या बहिणींना मंजूर अनुदानातील गैरव्यवहारात सामील अधिकाऱ्यांवर प्रथम गुन्हे दाखल करूनच पुढील निर्णय घ्यावा.
चौकट
शिवसेना मध्यवर्ती कार्यालय अलिबाग येथून निघालेला मोर्चा हा हिराकोट तळ्याजवळ अडविण्यात आला मात्र शिवसैनिकांनी बॅरेजेट्स ढकलून जिल्हाधिकारी कार्यालयाच्या गेट जवळ गेले तिकडे पोलिसांनी त्यांना अडविले. यावरून पोलीस आणि शिवसैनिक ह्यांच्यामध्ये धुमश्चक्री सुरु होती
चौकट
कृषी मंत्री खेळतात रमी , कुठे आहे विकासाची हमी , बाजार उठलाय घोटाळ्यांचा, खुर्चीवरून उठाव घोटाळेबाजांना, महाराष्ट राज्यातील कलंकित आणि भ्रष्टचारी मंत्र्यांची हाकलपट्टी झालीच पाहिजे अश्या घोषणां देत कार्यकर्ते ह्यांनी जिल्हाधिकारी कार्यलयावर गेले.
