मुंबईकरांनो सावधान..! मुंबईसह उपनगरमध्ये पुढील 2 दिवसात मुसळधार पावसाची शक्यता!
✒नीलम खरात, मुंबई प्रतिनिधी ✒
मुंबई,दि.12 जुन:- देशात मान्सून दाखल झाल्यानंतर संपुर्ण महाराष्ट्र झमा झम पावसाला सुरुवात झाली आहे. पावसाला सुरुवात झाल्या नंतर बळीराजा सुखावला आहे पण अतिमुसळधार पावसाची शक्यता वर्तवण्यात आल्याने शेतक-यांत चिंतेचे वातावरण दिसून येत आहे. मुंबईतील प्रादेशिक हवामान केंद्राकडून आगामी 2 दिवस मुंबईकरांना सतर्कतेचा इशारा देण्यात आला आहे. मुंबई व उपनगरांमध्ये मध्यम ते मुसळधार पावसाची तसेच, काही ठिकाणी अतिमुसळधार पावासाची शक्यता वर्तवण्यात आलेली आहे. तसेच, येत्या पाच दिवसात मुंबईसह कोंकण किनारपट्टीला मुसळधार पावसाचा इशारा देखील देण्यात आलेला आहे.
भारतीय हवामान विभागाने 13 व 14 जून या कालावधीदरम्यान मुंबईत अतिमुसळधार पावसाची शक्यता असल्याचा इशारा दिला असल्यामुळे पालिका सज्ज झाली आहे. मुंबईतील समुद्रकिनारे आणि समुद्र किनाऱ्यांलगतचा परिसर आदी ठिकाणी जाणे नागरिकांनी टाळावे, असे आवाहन मुंबई महापालिकेच्या आपत्कालीन व्यवस्थापन खात्याद्वारे करण्यात आले आहे. तसेच या पार्श्वभूमीवर पालिकेने नियंत्रण कक्षांना दक्षतेचा इशारा दिला आहे.
दरम्यान, मुंबईसह उपनगरात रात्रीपासून दमदार पाऊस सुरू आहे. तर, मुंबई व कोकण किनारपट्टीस अतिवृष्टीचा देखील इशारा दिलेला आहे. आज सकाळपासून मुंबईत अंधेरी, दादर, सायन, कुर्ला, परळ, कुर्ला या ठिकाणांसह पश्चिम उपनगरात पाऊस सुरू आहे. अनेक भागांमधील रस्त्यांवर पाणी साचल्याने वाहन चालकांना अडचणींना सामोरे जावे लागत आहे.
