मुंबई: फेसबुक, ट्विटर, व्हॉट्सअॅप, इन्स्टाग्राम कुठलीही सोशल मीडिया साइट उघडली की सध्या एकच फोटो आणि एकच नाव दिसतंय ते म्हणजे प्रिया प्रकाश वारियरचं. कलिजा खल्लास करणाऱ्या अदांनी तमाम तरुणाईला घायाळ करणाऱ्या प्रियानं इन्स्टाग्रामवरील लोकप्रियतेच्या बाबतीत बॉलिवूडची अभिनेत्री कतरिना कैफला आव्हान दिलंय.
सोशल मीडियापासून दूर राहणाऱ्या कतरिनाने काही महिन्यांपूर्वीच इन्स्टाग्रामवर पदार्पण केलं आणि २४ तासांत तिच्या फोलोअर्सची संख्या काही लाखांत पोहोचली. परंतु, कतरिनाचा हा रेकॉर्ड प्रियानं मोडलाय. प्रियाच्या गाण्याचा व्हिडिओ व्हायरल झाल्यानंतर तिला इन्स्टाग्रामवर २४ तासांत १० लाखांहून अधिक लोकांनी फॉलो केलंय. हा वेग कतरिनाला मिळालेल्या प्रतिसादापेक्षा कितीतरी अधिक आहे. अर्थात, कतरिनाचे एकूण फोलोअर्स सध्यातरी प्रियापेक्षा जास्त आहेत.
सोशल मीडियावर हिट ठरलेला प्रियाचा व्हिडिओ ‘ओरू अडार लव्ह’ या आगामी सिनेमातील ‘मानिका मलियारा पूवी’ या गाण्याचा भाग आहे. हा मल्ल्याळम चित्रपट ३ मार्चला प्रदर्शित होणार आहे.
