स्वच्छतेचे पुजारी सफाई कर्मचारी… कवयित्री संगीता ठलाल, कुरखेडाच्या सफाई कर्मचाऱ्यांसोबत रक्षाबंधन सण साजरा
कृष्णकुमार निकोडे
मो: ७७७५०४१०८६
दि.१३, कुरखेडा/ गडचिरोली: गडचिरोली जिल्ह्यातील कुरखेडा तालुका मुख्यालय येथील सफाई सफाई कर्मचाऱ्यांसोबत कवयित्री संगीता ठलाल यांनी रक्षाबंधन सण उत्साहात साजरा केला. त्याप्रसंगी मार्गदर्शन करताना संगीता ठलाल म्हणाल्या, की स्वच्छतेचे खरे पुजारी तर हे स्वच्छता कर्मचारी आहेत.
कोरोनाच्या भयावह काळातही आपल्या जीवाची पर्वा न करता नित्यनेमाने कार्य करणारे सफाई कर्मचारी आहेत. त्यांचे समाजासाठी व देशासाठी विशेष योगदान राहिले आहे. त्यांचे असे अचाट कार्य पाहून तालुका मुख्यालय कुरखेडा येथील सुप्रसिद्ध कवयित्री, लेखिका व सामाजिक कार्यकर्त्या संगीता संतोष ठलाल यांनी स्थानिक नगरपंचायतमध्ये त्यांच्या सोबत रक्षाबंधन सण उत्साहात साजरा केला. त्या अनुषंगाने ठलाल यांच्यातर्फे सफाई कर्मचारी बंधू व भगिनी यांना राख्या बांधल्या. सोबतच त्यांचा पुष्पगुच्छ व शाल देऊन सत्कार करण्यात आला. तसेच गोडधोड पदार्थ खाऊ घालण्यात आले.या प्रसंगी मार्गदर्शन करताना कवयित्री संगीता ठलाल म्हणाल्या, की सफाई कर्मचारी बांधव यांचे समाजासाठी व आपल्या देशासाठी विशेष योगदान आहेत. कोरोनाच्या जीवघेण्या काळात कितीतरी सफाई कर्मचारी बंधू सफाई करताना कोरोनाच्या विळख्यात सापडून हे जग सोडून गेले. समाजाने त्यांची कदर करायला पाहिजे व त्यांचे योगदान जाणून घ्यायला पाहिजे. मानव समाजातील सर्व घटकांनी त्यांच्याप्रती आपुलकी ठेवायला विसरू नये, अशा त्या म्हणाल्या.
सदर कार्यक्रमाला कुरखेडा नगरपंचायतच्या नगराध्यक्षा अनिता बोरकर, रामभाऊ लांजेवार, स्वप्नील निलगिरवार, अशोक कंगाले, देवा देशमुख, समीर नंदेश्वर, लिला पुराणकर, नगरपंचायतचे सर्व कर्मचारीवृंद व सत्कारमुर्ती सफाई कर्मचारी बंधू, भगिनी, आदी उपस्थित होते. उपस्थित मान्यवरांनी त्यांच्या उपक्रमाची प्रशंसा केली. तत्पश्चात त्यांचा रक्षाबंधन सण व सत्कार समारंभ पार पडला. सामाजिक कार्यकर्त्या संगीता ठलाल यांच्या या कार्याचे पंचक्रोशीतही कौतुक होत आहे, हे विशेष!
