प्रेमसंबध ठेवण्यास नकार दिल्याने तसेच चारित्र्याच्या संशयातून तरुणीची हत्या.
हॉटेलमध्ये मुक्कामी थांबलेल्या भोईसर येथील तरुणीचा चारित्र्याच्या संशयातून खून करण्यात आला. प्रियकराने बेदम मारहाण करीत तिचा गळा घोटल्याचे समोर येत असून, न्यायालयाने संशयित आरोपीस सोमवारपर्यंत पोलिस कोठडी सुनावली.
भोईसर:- तन्मय प्रवीण धानवा वय 21, रा. मासवन, जिल्हा पालघर असे पोलिस कोठडी सुनावण्यात आलेल्या संशयिताचे नाव आहे. भोईसर, जि. ठाणे येथील अर्चना सुरेश भोईर या तरुणीचा मृतदेह बुधवारी सीबीएस नजीकच्या हॉटेल सीटी पॅलेसमधील रूममध्ये आढळून आला. या संशयास्पद मृत्युमुळे खळबळ उडाली होती.
अर्चना आडगाव परिसरातील एका नर्सिंग कॉलेजमधील विद्यार्थीनी असून, ती मंगळवारी बेपत्ता झाली होती. कुटुंबीयांनी त्याबाबत आडगाव पोलिस ठाण्यात बेपत्ता असल्याची सुद्धा तक्रार दिली होती. त्याच दिवशी प्रियकर असलेला संशयित तिला भेटण्यासाठी शहरात आला होता. दोघांनी सीबीएस नजीकच्या हॉटेल सिटी पॅलेस येथे मुक्काम केला. या काळात संशयित तन्मय आणि अर्चनात चारित्र्याच्या संशयातून वादास सुरुवात झाली. हा वादच अर्चनाच्या मृत्यूस कारणीभूत ठरल्याचे समजते. याबाबत अर्चनाचे वडिल सुरेश भोईर रा. भोईसर यांनी तक्रार दिली आहे. त्यात संशयिताच्या काकाने फोनद्वारे माहिती दिल्याने हॉटेल गाठले असता मुलगी रूममधील बेडवर मृतावस्थेत होती. तिला मारहाण करण्यात आल्याचे आढळून आले. मुलीने प्रेमसंबध ठेवण्यास नकार दिल्याने तसेच चारित्र्याच्या संशयातून संशयित तन्मय याने तिला मारहाण करून ठार मारल्याचे त्यांच्या फिर्यादीत नमूद केले आहे. घटनास्थळीच संशयितास अटक झाली असून, न्यायालयाने त्यास पाच दिवसांची पोलिस कोठडी सुनावली आहे.
Post Views: 67