जळगाव रुग्णालयाचा पॉझिटिव्ह निगेटिव्हच्या खेळात महिलेचा गेला जीव!
जळगाव:- कुसुबा येथील एका महिलेला खासगी रूग्णालयाने पॉझिटिव्ह असल्याचे सांगितले. शासकीय रूग्णालयाने निगेटिव्ह असल्याचे सांगून ग्लुकोजचे पाणी पिण्याचा सल्ला देत घरी पाठवले. तर, याच महिलेचा आज सकाळी मृत्यू झाल्याने खळबळ उडाली. या प्रकरणी दोषींवर कारवाईची मागणी करण्यात येत आहे. यातून पुन्हा प्रशासकीय भोंगळ कारभाराचे उदाहरण पुन्हा समोर आले आहे.
कुसुंबा येथील एका महिलेस त्रास जाणवू लागल्याने रुग्णालयात दाखल करण्यात आले. तेथील उपचाराने बरे न वाटल्याने ओम क्रिटीकल केअर या खासगी हॉस्पिटलमध्ये दाखल करण्यात आले. तेथे अँटीजन या प्रकारात चाचणी केली असता ती पॉझिटिव्ह आली. यामुळे संबंधीत महिलेस जिल्हा कोविड रूग्णालयात हलविण्यात यावे असे संबंधीत हॉस्पिटलने सुचविले.
या सूचनेनुसार त्या महिला रूग्णाला दुसर्‍या दिवशी अर्थात ११ सप्टेंबर रोजी जिल्हा शासकीय वैद्यकीय महाविद्यालयात दाखल करण्यासाठी नेण्यात आले. त्याप्रसंगी वैद्यकीय अधिकार्‍यांनी ही महिला कोरोना निगेटिव्ह असल्याचे सांगून त्यांना घरी घेऊन जाण्याचा सल्ला दिला. एवढेच नव्हे तर या महिलेस फक्त घशाचे इन्फेक्शन झाले असून ते ग्लुकोजच्या पाण्याने बरे होईल असे देखील सांगण्यात आले. दरम्यान, आज सकाळी या महिलेला श्‍वास घेण्यासाठी त्रास होऊ लागल्याने त्यांना पुन्हा शासकीय वैद्यकीय महाविद्यालात दाखल करण्यात आले.
यावेळी संबंधीतांनी ही महिला कोरोना पॉझिटिव्ह होती. मात्र जागा नसल्याने तुम्हाला घरी पाठविण्यात आल्याचे सांगितले. तेव्हा तिच्या नातेवाईकांचा संताप अनावर झाला. दरम्यान, या महिलेवर उपचार सुरू असताना आज सकाळी तिचा मृत्यू झाला. संतापजनक बाब म्हणजे आधी ही महिला निगेटिव्ह असल्याचे सांगणार्‍या डॉक्टर्सनी ती रूग्ण पॉझिटिव्ह असल्याचे आज मान्य केले.
ही महिला कोरोना पॉझिटिव्ह असतानाही तिला वैद्यकीय अधिकार्‍यांनी निगेटिव्ह असल्याचे का सांगितले? तिला फक्त ग्लुकोज पाणी देण्याचे का सांगण्यात आले? जागा खाली नव्हती तर तसे सांगितले असते तर तिला दुसर्‍या खासगी रूग्णालयात दाखल केले असते असे तिच्या नातेवाईकांचे म्हणणे आहे. तथापि, असे न करता, डॉक्टर्सच्या बेपर्वाईने एका महिलेचा बळी गेला असून या प्रकरणी दोषींवर कारवाई करण्यात यावी अशी मागणी त्या महिलेचा मुलगा माधव खरोटे यांनी केली आहे.
