ठाणे- गँगस्टरकडून बांधकाम व्यावसायिकांना येणाऱ्या धमक्या थांबलेल्या नसून अंडरवर्ल्ड डॉन दाऊद इब्राहीम याचा हस्तक रियाज भाटी आणि त्याच्या अन्य साथीदारांनी अंबरनाथमधील एका व्यावसायिकाने बंदुकीचा धाक दाखवून कार्यालयातूनच अपहरण केले. त्यानंतर व्यावसायिकाकडून जबरदस्तीने बांधकाम प्रकल्प रद्द करून घेत तो दुसऱ्या विकासकाला दिल्याचा धक्कादायक बाब समोर आली आहे. या बांधकाम व्यावसायिकाला कुख्यात गुंड छोटा शकील यानेही धमक्या दिल्या होत्या. या प्रकरणी शिवाजीनगर पोलिस ठाण्यात भाटी याच्यासह अन्य काही जणांविरुद्ध गुन्हा दाखल करण्यात आला असून खंडणीविरोधी पथक पुढील तपास करत आहे.
केंद्र आणि राज्य स्तरावरील मोठमोठ्या राजकीय नेत्यांबरोबरचे रियाजचे फोटो आहेत. सोशल मीडियावर चमकण्याची रियाजला मोठी हौस असल्याचे सांगितले जात आहे. पूर्वी भाटी हा छोटा राजनसाठी काम करत असे अशी माहिती खंडणीविरोधी पथकाचे प्रमुख प्रदीप शर्मा यांनी दिली. त्याच्याविरुद्ध गंभीर गुन्हे दाखल आहेत. बनावट पासपोर्टच्या प्रकरणातही त्याला अटक झाली होती. शिवाय त्याचे बॉम्बे क्रिकेट लीगमध्ये कोटा ही टीमही असल्याचे शर्मा म्हणाले. उस्मान हा तर १९९३ मुंबई बॉम्ब स्फोटातील आरोपी असून त्याला माफीचा साक्षीदार केले आहे. तर अफगाणची टवेल्स एजन्सी असून या गुन्ह्यात छोटा शकील यालाही आरोपी केल्याचे शर्मा यांनी सांगितले.