फसवणुकी विरोधात माथेरानकर एकवटले,18 मार्च पासून माथेरान बेमुदत बंद
✍🏻श्वेता शिंदे ✍🏻
माथेरान शहर प्रतिनिधी
मो.8793831051
माथेरान :- माथेरानमधील प्रवेशद्वार असलेल्या दस्तुरीवर काही घोडेवाल्यांकडून पर्यटकांची दिशाभूल,फसवणूक केली जाते याला आळा घालण्यासाठी माथेरानकरांनी प्रशासनाकडे पाठपुरावा केला मात्र त्याला यश न आल्यामुळे अखेर माथेरान बचाव संघर्ष समितीने माथेरान बंदचे हत्यार उपसले आहे जो पर्यंत माथेरान प्रशासन फसवणुकीचे धंदे बंद करत नाहीत तोपर्यंत माथेरान बेमुदत बंदचे आवाहन करण्यात आले आहे.
रायगड जिल्ह्यातील सर्वात टुमदार पर्यटनस्थळ म्हणून माथेरानचा नावलौकिक आहे.या पर्यटनस्थळावर उदरनिर्वाहासाठी अनेक भागातुन लोक काम करण्यासाठी येतात.यामध्ये कर्जत तालुक्यातून मोठ्या प्रमाणात आपली उपजीविका करण्यासाठी हातरीक्षा ओढणारे,कुली काम करणारे,घोडेवाले जे सुद्धा येतात.यातील काही घोडेवाल्यांकडून पर्यटकांची दिशाभूल,फसवणूक केली जाते असा आरोप माथेरानकर करत आहेत. येथे आलेल्या पर्यटकाने तर येथील आपबीती सोशल मीडियावर टाकली.यामुळे त्याच्या वाईट प्रतिक्रिया उमटू लागल्या.
सुंदर माथेरानची बदनामी करणाऱ्या घोडेवाल्यांवर येथील प्रशासनाने जरब बसवावी.यासाठी हे माथेरान बेमुदत बंदचे आवाहन केले आहे.27 फेब्रुवारीला महसुल विभाग,नगरपालिका,वन विभाग आणि पोलीस प्रशासनाला या आंदोलनाचे निवेदन देण्यात आले होते पण कुठल्याच प्रशासनाने याकडे गांभीर्याने पाहिले नसल्याने माथेरान बचाव संघर्ष समितीने नाराजगी प्रकट केली.19 दिवसांचा वेळ देऊनही प्रशासनाने कोणतीच कारवाई केली नसल्याने अखेर नाईलाजास्तव माथेरान बचाव संघर्ष समितीने माथेरान बेमुदत बंद ठेवण्याचा निर्णय घेतला असून मंगळवार दि.18 पासून माथेरान बेमुदत बंद राहणार आहे. तरी या संदर्भात माथेरान पर्यटन बचाव संघर्ष समितीच्या माध्यमातून येथील नागरिक तसेच व्यवसायिकांना उद्याच्या बंद चे आव्हान करण्यात येत आहे.
——————————-
माथेरानचे प्रवेशद्वार असलेल्या दस्तुरी नाक्यावर पर्यटकांच्या होणाऱ्या फसवणुकीला आळा बसावा व पर्यटकांची होणारी दिशाभूल थांबवण्याकरिता प्रशासनाकडून ठोस उपाय योजना व्हावी यासाठी आम्ही माथेरान नगरपरिषद, माथेरान वनविभाग तसेच माथेरान पोलीस ठाणे कार्यालय यांना रीतसर पत्रव्यवहार केला होता. मात्र आज मा. अधीक्षक साहेबांनी घेतलेल्या आढावा बैठकीत येथील प्रशासनातील कोणत्याच विभागाने त्याची दखल न घेतल्याने मंगळवार दि. 18 पासून ढिमं प्रशासनाच्या विरोधात माथेरान बेमुदत बंद करत आहोत.
कुलदीप जाधव, (समन्वयक, पर्यटन बचाव संघर्ष समिती माथेरान )
