नाशिकच्या वालदेवी धरणात 5 मुलीसह सहा जणांचा बुडून मृत्यू.
✒नाशिक जिल्हा प्रतिनिधी ✒
नाशिक,दि.17 एप्रिल:- येथून एक खळबळजनक बातमी समोर आली आहे. नाशिक येथील वालदेती धरणात अत्यंत धक्कादायक घटना घडली आहे. सेल्फीच्या नादात 5 मुलीसह सहा मुलांना आपला जीव गमवावा लागला आहे.
नाशिकमधील वालदेवी धरणावर वाढदिवस साजरा करण्यासाठी 9 मित्र गेले होते. गेलेल्या 5 मुली आणि एका मुलाचा धरणात बुडून मृत्यू झाल्याची दुर्दैवी घटना घडली आहे. आतापर्यंत केवळ एका मुलीचा मृतदेह बाहेर काढण्यात यश आले आहे. रात्र असल्याने शोधकार्यात अडथळे निर्माण झाले आहेत. म्हणुन मृत्युदेह बाहेर काढायला उशीर लागत आहे.
सर्व मित्र सेल्फी घेण्याच्या नादात तोल गेला आणि 5 मुली आणि 1 मुलगा पाण्यात पडल्याचे सांगण्यात येत आहे. नाशिकपासून जवळच वालदेवी धरण असून या धरणावर केलेलं बर्थडे सेलिब्रेशन सहा जणांसाठी शेवटचं ठरलं आहे. मित्र परिवारातील एका मुलीचा वाढदिवस असल्याने सर्वानी वाढदिवस वालदेवी येथील धरणावर साजरा करण्याचा बेत आखला होता. त्यानुसार या सर्वांनी जोरदार सेलिब्रेशन केलं. केकही कापण्यात आला. त्यानंतर या सर्वांना सेल्फी काढण्याचा मोह झाला आणि तिथेच घात झाला.
धरणाच्या कडेला उभे राहून सेल्फी काढत असतानाच तोल जावून पाच मुली खाली पाण्यात कोसळल्या. त्यांना वाचवण्यासाठी एका मुलाने उडी घेतली. मात्र, या सर्वांचा बुडून मृत्यू झाल्याचे सांगण्यात येत आहे. या घटनेची माहिती मिळताच स्थानिक ग्रामस्थ तसेच वाडीवरहे पोलीस तातडीने घटनास्थळी दाखल झाले व मदतकार्याला सुरुवात करण्यात आली. रात्रीची वेळ असल्याने मदत व शोधकार्यात अडथळे येत आहेत. आतापर्यंत फक्त एका मुलाचाच मृतदेह हाती लागू शकला आहे. शोधकार्य रात्रभर सुरू राहणार असल्याचे सांगण्यात आले. दरम्यान, ही घटना कळताच या मुलांचे पालक व नातेवाईकांनीही घटनास्थळी धाव घेतली आहे. संबंधित सर्व मुलं मित्र-मैत्रिणी होते. नाशिकच्या पाथर्डी भागात राहणारे हे सर्वजण होते.
