*प्रतिभाताई शिंदे यांची माजी केंद्रीय कृषी मंत्री शरद पवार व राष्ट्रवादीच्या नेत्यांशी शेती प्रश्नाबाबत चर्चा*
*शेतकरी आंदोलनाच्या बाजूने उभे राहून केंद्रीय कायद्यांना विरोध करणारा ठराव करण्याबाबत आग्रह*
*शेतकरी आंदोलनाच्या बाजूने उभे राहून केंद्रीय कायद्यांना विरोध करणारा ठराव करण्याबाबत आग्रह*
मिडीया वार्ता न्यूज
जळगाव जिल्हा प्रतिनिधी
विशाल सुरवाडे
जळगाव : अलीकडेच महाराष्ट्र सरकारने राज्याच्या कृषी कायद्यामध्ये सुधारणा करण्याचा निर्णय घेतला आहे. राज्याच्या येत्या पावसाळी अधिवेशनात महाराष्ट्र राज्याच्या कृषी उत्पन्न बाजार समितीच्या कायद्यातील सुधारणा करण्यासाठी पाऊल उचलले जाणार आहे. या पार्श्वभूमीवर लोकसंघर्ष मोर्चाच्या राष्ट्रीय अध्यक्ष तथा किसान मोर्चाच्या राष्ट्रीय कमिटी प्रमुख सदस्य प्रतिभाताई शिंदे यांनी भूमिका व अपेक्षा माजी केंद्रीय कृषी मंत्री तथा राष्ट्रवादी काँग्रेसचे सर्वेसर्वा श्री शरद पवार आणि प्रमुख नेत्यांसमोर मांडल्या. राष्ट्रवादीच्या नेत्यांनी शेतकरी आंदोलनाच्या बाजूने उभे राहावे व केंद्रीय कायद्यांना विरोध करणारा स्पष्ट ठराव करावा असे आवाहन सर्व शेतकरी व आंदोलनातील प्रमुख नेत्यांच्या वतीने प्रतिभाताई यांनी केले. शिंदे यांनी तसे निवेदन देऊन शरद पवार यांची भेट घेऊन विस्तृत चर्चा केली.
महाराष्ट्र सरकारने नुकताच शेतकरी बांधवांना केंद्रस्थानी ठेऊन राज्याच्या कृषी कायद्यामध्ये सुधारणा करण्याचा निर्णय घेतल्याबद्दल प्रतिभाताई शिंदे यांनी श्री शरद पवार साहेब व सर्वांचे अभिनंदन केले. तसेच मा. उपमुख्यमंत्री व वित्त मंत्री अजित पवार, राष्ट्रवादीचे खासदार अमोल कोल्हे, मा.आ. विजयाताई चव्हाण, मा. धनंजय मुंडे(सामाजिक न्याय व विशेष सहाय्य), मा. जयंत पाटील (जलसंपदा) यांच्याशी प्रतिभाताई शिंदे यांनी सविस्तर चर्चा केली. याप्रसंगी शिवसेनेचे खासदार अनिल देसाई हे देखील उपस्थित होते.
शेतकरी कष्टकरी ह्यांच्या हितासाठी ह्या कायद्यात सुधारणा आवश्यक आहेत व त्या तातडीने होणे गरजेचे आहे अशी अपेक्षा व्यक्त करून सुधारणा कोणत्या असाव्यात ह्या बाबत काही ठोस प्रस्ताव सादर करण्याची इच्छा त्यांनी व्यक्त केली. त्यानुसार अधिवेशनापूर्वी चर्चा करून व शेतकऱ्यांची भूमिका व अपेक्षा व अडचणी समजून घेऊन त्यानंतरच सरकारने राज्यस्तरीय कृषी संबंधी सुधारणेस अंतिम रूप द्यावे तसेच शेतकऱ्यांच्या हिताची काही नवी धोरणे व आवश्यक कायदे ह्यावर देखील भूमिका आणि निर्णय घेण्याचा आग्रह लोकसंघर्ष मोर्चाच्या वतीने करण्यात आला.या चर्चेतून शेतकऱ्यांना न्याय मिळवून देण्याच्या दृष्टीने राष्ट्रवादी काँग्रेस महत्वाची भूमिका बजावतील अशी आशा प्रतिभाताई शिंदे यांनी व्यक्त केली.
