धान खरेदी नोंदणीच्या मुदत वाढीमुळे राज्यातील धान उत्पादक शेतकऱ्यांना मिळणार दिलासा
• पालकमंत्री मुनगंटीवार यांच्या पाठपुराव्याला यश
🖋️ मीडिया वार्ता वृत्तसेवा
📱 8830857351
चंद्रपूर : 19 जानेवारी
खरेदी केंद्रांची मोजकी संख्या आणि इंटरनेट नेटवर्कची समस्या यामुळे शेतकऱ्यांची धान खरेदी नोंदणी पुरेशी झालेली नसल्यामुळे नोंदणीची मुदत आता ३१ जानेवारी २०२४ पर्यंत वाढविण्यात आली आहे. आतापर्यंत तीनदा ही मुदत वाढविण्यात आली आहे. शेतकऱ्यांची होणारी गैरसोय लक्षात घेता राज्याचे वन, सांस्कृतिक कार्य व मत्स्य व्यवसाय मंत्री तथा चंद्रपूरचे पालकमंत्री सुधीर मुनगंटीवार यांनी यासाठी पाठपुरावा केला होता, त्या पाठपुराव्याला यश आले आहे.
शेतकरी बांधव आधारभूत किमंत योजनेअंतर्गत नेमण्यात आलेल्या खरेदी केंद्रावर नोंदणी करून धान व भरडधान्य विक्री करतात. जिल्ह्यात केंद्रांची संख्या फार मोजकी आहे. त्यामुळे ज्या जिल्ह्यात धान व भरडधान्य मोठ्या प्रमाणात उत्पन्न होते त्या जिल्ह्याला या खरेदी नोंदणीच्या मिळालेल्या मुदतवाढीमुळे लाभ होणार आहे. चंद्रपूर जिल्ह्यातील शेतकरी बांधवांनी याबाबत मागणी केली होती. या मागणीचे गांभीर्य लक्ष्यात घेत वने व सांस्कृतिक कार्य मंत्री सुधीर मुनगंटीवार यांनी धान नोंदणीची मुदत ताबडतोब वाढविण्यात यावी, असा आग्रह केला.
मुनगंटीवार यांनी राज्याचे अन्न, नागरी पुरवठा व ग्राहक संरक्षण मंत्री छगनजी भुजबळ यांना पत्र लिहत मुदत वाढविण्याची आग्रही मागणी केली. मुनगंटीवार यांच्या पत्राची दखल घेत भुजबळ यांनी संबंधित विभागाला काही तासातच आदेश निर्गमित करण्याचे निर्देश दिले. त्यानुसार धान नोंदणीची मुदत आता ३१ जानेवारी २०२४ पर्यंत वाढविण्यात आली आहे. पुन्हा एकदा मुदत वाढवून मिळाल्याने शेतकऱ्यांनी सुधीर मुनगंटीवार यांचे आभार व्यक्त केले आहे.
