मौजा सावरी येथे सिमेंटचा टॉवर तोडताना छत कोसळले, व तरुण बांधकाम मजूर झाला जागीच ठार
तरुण युवक यापूर्वी इलेक्ट्रिक काम करायचा, पण त्या कामात कमाई नसल्याने लागला बेलदारी कामात
✍️ भवन लिल्हारे जिल्हा प्रतिनिधी भंडारा📱 मो.नं.9373472847📞
भंडारा : दिनांक २० जानेवारी २०२४ रोजी भंडारा जिल्ह्यातील जवाहरनगर येथून जवळच असलेल्या मौजा सावरी ( ता. जि. भंडारा ) येथील भिमराव लाडे यांच्या घरी स्लॅबचे छत तोडतांना सिमेंटचा टॉवर तोडण्याच्या कामादरम्यान छातीवर छत कोसळल्याने २० वर्षीय तरुण मजुराचा जागीच मृत्यू झाला. शुभम रमेश पेलने असे या मजुराचे नाव असून ही दुर्घटना सकाळी १०.०० वाजताच्या सुमारास घडली.
सविस्तर वृत्त असे की, शुभमने दोन दिवसांपूर्वी गावातीलच भिमराव लाडे यांच्याकडून छत तोडण्याचे काम ठेक्याने घेतले होते. रोजच्या प्रमाणे शनिवारी तो सकाळी ९:३० वाजता सुमारास लाडे यांच्या छतावर काम करण्याकरिता आला होता. छतावर सिमेंट काँक्रीटचे तीन पिल्लर (टॉवर) होते. त्याने दोन पिल्लर कसेबसे तोडले. तिसरा पिल्लर तोडत असताना, छतच त्याच्या छातीवर कोसळले. यामुळे जोराचा आवाज झाल्याने परिसरातील “नागिरकांनी घटनास्थळाकडे धाव घेतली. यावेळी शुभम कोसळलेल्या छताखाली दबून अडकलेला अवस्थेत दिसला. नागरिकांनी त्याला काढण्याचे आटोकाट प्रयत्न केले. मात्र त्याची प्राणज्योत तिथेच मालवली होती. या अपघाताची माहिती पोलिसांना भ्रमणध्वनिने कळविल्यावर त्यांनी ताबडतोब घटनास्थळी भेट दिली. प्रेत मलब्याबाहेर बाहेर काढून शवविच्छेदनासाठी पाठविले. त्याच्या पार्थिवावर रविवारी सकाळी १० वाजता सावरी मोक्षधाम येथे अंत्यसंस्कार करण्यात येणार आहे.
*संसार पडला उघड्यावर*
शुभमचे नुकतेच दोन वर्षांपूर्वी लग्न झाले होते. त्याला मुलबाळ नाही. आई-वडील, एक भाऊ असे कुटूंब त्याच्या पाठीशी आहे. या घटनेमुळे त्याचा संसार उघड्यावर पडला आहे.
*शुभम चे स्वप्न अपुरेच*
तो यापूर्वी इलेक्ट्रिशियनचे काम करायचा. मात्र त्या कामात कमाई नसल्याने मागील तीन महिन्यापासून तो बेलदारीचे काम करायला लागला होता. या व्यवसायासाठी त्याने अलिकडेच दगड-विटा, सिमेंटचा कॉलम फोडण्यासाठी क्रॅकर मशीनही घेतली होती. या व्यवसायातून कुटूंब सावरण्याचे त्याचे स्वप्न होते. मात्र ते पूर्ण होण्याआधीच नियतीने डाव साधला. व त्याचे स्वप्न मात्र स्वप्नच राहीले.
