महाड तालुक्यातील झांजेकोंड गावाला सलग दुसऱ्या वर्षी स्वदेस फाउंडेशन मार्फत मिळाला स्वप्नातील गावाचा दर्जा
✍️नंदकुमार चांदोरकर ✍️
माणगाव तालुका प्रतिनिधी
📞८९८३२४८०४८📞
माणगाव : स्वदेस फाउंडेशनचे संस्थापक रॉनी स्क्रूवाला आणि झरीना स्क्रूवाला तसेच मुख्य कार्यकारी अधिकारी मंगेश वांगे व संचालक प्रदीप साठे यांच्या मार्गदर्शनाखाली रायगड जिल्ह्यातील सात तालुक्यांमध्ये अनेक विकासाची वेगवेगळी कामे होत आहेत. दोन वर्ष आधी स्वदेस फाउंडेशन ने गावांचा सर्वांगीण विकास करण्यासाठी आणि गावाच्या विकासासाठी लोकांचा सहभाग वाढवण्यासाठी स्वप्नातील गाव या स्पर्धेचे आयोजन केलेले होते. या स्पर्धेमध्ये अनेक गावांनी हिरारीने भाग घेतला होता. त्यावेळी झांजेकोंड या गावाने सुद्धा स्वप्नातील गाव स्पर्धेमध्ये भाग घेऊन स्वप्नातील गाव हा किताब स्वदेस फाउंडेशन कडून मिळवला होता. त्यानंतर सुद्धा गावाने कामांमध्ये सातत्य ठेवलेलं आहे आणि गुणवत्ता सुद्धा ठेवलेली आहे. तसेच काही नवीन कामांचे सुद्धा त्यामध्ये भर टाकलेले आहे त्यामुळे सलग दुसऱ्या वर्षी स्वदेस फाउंडेशनच्या माध्यमातून झांजेकोंड या गावाला शुक्रवार दिनांक १७ मे २०२४ रोजी स्वप्नातील गावाचा किताब देण्यात आला.
या कार्यक्रमासाठी स्वदेस फाउंडेशनचे उपसंचालक तुषार इनामदार व वरिष्ठ व्यवस्थापक विशाल वरुटे हे प्रमुख पाहुणे म्हणून उपस्थित होते तसेच स्वदेस फाउंडेशनचे व्यवस्थापक प्राजक्ता खेडेकर ,मिलिंद आढाव, वरिष्ठ समन्वयक भूषण नाईकर सरिता गायकवाड, आरोग्य समन्वयक सुप्रिया जांमखिंडे , प्रशिक्षक सुधीर वाणी मुरली कासार ग्राम विकास समितीचे अध्यक्ष महेश झांजे कमिटीचे इतर सर्व सदस्य उपस्थित होते. तसेच गावातील युवक, प्रतिष्ठित नागरिक, ज्येष्ठ नागरिक व महिला वर्ग मोठ्या संख्येने उपस्थित होते.
झांजेकोंड हे गाव महाड शहरापासून साधारणता पाच ते सहा किलोमीटर अंतरावर आहे. लोकसंख्येने हे गाव जरी लहान असले तरी या गावाने एकत्रितपणे पुढे येऊन गाव विकासासाठी खूप कामे केली आहेत. या गावांमध्ये शंभर टक्के घरे पक्की आहेत, गावामध्ये अंतर्गत पक्का रस्ता आहे, सर्व घरे रंगीत एकाच कलरचे आहेत, सर्वांकडे शौचालय आहे, पिण्याचे शुद्ध पाणी आहे, सर्व कुटुंबांचा आरोग्य विमा आहे, सर्व कुटुंबांच्या हाताला काम आहे, पात्र लाभार्थ्यांना पेन्शन योजना मिळत आहेत, गावामध्ये प्लास्टिकचे व्यवस्थापन केले जात आहे, ओल्या व सुख्या कचऱ्याचे व्यवस्थापन केले जात आहे, अशी अनेक विकासाची काम या गावांमध्ये झालेले आहेत त्यामुळेच या गावाला स्वप्नातील गावाचा दर्जा मिळालेला आहे.
गावाचा विकास करण्यासाठी आणि गाव स्वप्नपूर्ण बनवण्यासाठी गाव विकास समितीचे अध्यक्ष आणि सर्व सदस्य यांची विशेष मेहनत आहे, त्याचबरोबर गावातील युवक आणि महिला यांचे योगदान सुद्धा खूप महत्त्वाचे आहे.
झांजेकोंड या गावाने अत्यंत उल्लेखनीय कामगिरी करून महाड तालुक्यामध्ये एक नवीन आदर्श उभा केलेला आहे .
