पनवेल पंचायत समिती येथे जल सुरक्षकांनी घेतली स्वच्छता शपथ
बैठक व प्रशिक्षणही संपन्न
बैठक व प्रशिक्षणही संपन्न
✍मनोज खोब्रागडे✍
मध्य महाराष्ट्र ब्युरो चीफ
मीडिया वार्ता न्यु-8208166961
अलिबाग,जि.रायगड :- “स्वच्छता ही सेवा” अभियानाची जिल्ह्यात मुख्य कार्यकारी अधिकारी डॉ.किरण पाटील व उप मुख्य कार्यकारी अधिकारी पाणी व स्वच्छता डॉ.ज्ञानदा फणसे यांच्या मार्गदर्शनाखाली गतीने अंमलबजावणी सुरू आहे. त्यानुषंगाने आज पनवेल पंचायत समिती येथील सभागृहात गटविकास अधिकारी श्री.संजय भोये यांच्या मार्गदर्शनाखाली पनवेल तालुक्यातील जल सुरक्षकांची बैठक व प्रशिक्षण संपन्न झाले.
यावेळी संवाद तज्ञ श्री.सुरेश पाटील यांनी “स्वच्छता ही सेवा” अभियानाची अंमलबजावणी करण्याबाबत माहिती दिली. यामध्ये गावात श्रमदान मोहीम राबविणे, घर तिथे शोषखड्डा तयार करणे, सार्वजनिक इमारतींची स्वच्छता व प्लास्टिक संकलन ,भिंती रंगविणे व घोषवाक्य लिहिणे, odf plus ठराव घेणे आदी उपक्रमांची चर्चा झाली. यावेळी उपस्थितांना “स्वच्छता ही सेवा” अभियानाची शपथ दिली .
यावेळी मार्गदर्शन करताना गट विकास अधिकारी श्री.संजय भोये म्हणाले की, पाणी दूषित होणार नाही, यासाठी टीसीएलचा योग्य वापर करा व पाणी नमुने गोळा करून वेळेत प्रयोग शाळेत पाठविले जातील याची दक्षता घ्यावी. पाण्याचे स्त्रोत सुरक्षित असतील त्तर शुद्ध व स्वच्छ पाणी नागरिकांना मिळेल. माहितीची योग्य प्रकारे नोंद ठेवणे गरजेचे आहे. “स्वच्छता ही सेवा” अभियानामध्ये सर्वांचा लोकसहभाग घेऊन पनवेल तालुक्यात जास्तीत जास्त श्रमदान व शोषखड्डे होतील असे सूक्ष्म नियोजन केले आहे.
जिल्हा पाणी गुणवत्ता सल्लागार श्रीमती आदिती मगर यांनी संगणकीय सादरीकरणाद्वारे पाणी गुणवत्तेचे महत्व सांगितले. अनुजैविक व रासायनिक तपासणी विहित नमुन्यातील व कालावधीत पूर्ण करावी व ग्रामपंचायतीला ग्रीन कार्ड दर्जा कायम ठेवण्यासाठी प्रयत्न करावा, असे सांगितले. या बैठकीत पाणी योजना व जलस्त्रोत सुरक्षितपणाबाबत गावनिहाय आढावा घेण्यात आला.
यावेळी विस्तार अधिकारी श्रीमती मीनल कनोजे, गट समन्वयक श्री.ओंकार पाटील, समूह समन्वयक मनीषा साळवे व पनवेल तालुक्यातील सर्व ग्रामपंचायतींचे जल सुरक्षक उपस्थित होते.
