मुंबईच्या घाटकोपरमध्ये गडर मध्ये वाहत जात होते नवजात अर्भक, मांजरींनी वाचवले प्राण.
✒ नीलम खरात ✒
मुंबई महानगर प्रतिनिधी
मुंबई:- मुंबईतील घाटकोपर येथून एक संतापजनक बातमी समोर आली आहे. घाटकोपर येथील पंतनगर परिसरात एका गडर मधील नाल्यात नुकत्याच जन्मलेल्या अर्भकाला कपड्यात गुंडाळून फेकून देण्यात आले होते. हे अर्भक नाल्या वाहून जात असताना आसपासच्या मांजरींनी पाहिलं. त्यानंतर मांजरींनी जोर जोरात ओरडायला सुरुवात केली. मांजर का जोर जोरात ओरडत आहे हे बघायला नागरिक त्या नाल्यावर गेले असता हे सर्व या परिसरातील नागरिक लक्षात आल्यानंतर तातडीने त्यांनी याची माहिती पोलिसांना दिली. पोलिसांनी तातडीने घटनास्थळी दाखल होत या अर्भकाचा प्राण वाचवला.
नाल्यात एक नवजात अर्भक वाहत असल्याचं पाहून आसपासच्या मांजरींच्या ते लक्षात आलं. त्यानंतर त्यांनी जोर जोरात आरडाओरडा करायला सुरूवात केली. मांजरींचे ओरडणे काहीतरी वेगळं असल्याचं नागरिकांच्या लक्षात आलं. मांजरींना काहीतरी सांगायचं आहे हे आसपासच्या रहिवाशांच्या लक्षात आलं. ज्या दिशेने मांजरी ओरडत आहेत त्या दिशेला पाहिल्यानंतर त्यांना धक्काच बसला. कारण नाल्यात नुकतेच जन्मलेले अर्भक वाहत होते. ते कपड्यात गुंडाळलेले होते. त्यामुळे ते पाण्यावर तरंगत होते. घटनेचे गांभीर्य लक्षात घेत नागरिकांनी तातडीने पोलिसांना कळवलं. पोलिसांनीही क्षणाचाही विलंब न लावता घटनास्थळी धाव घेतली.
याची माहिती प्राप्त झाल्यानतंर पोलीस समयसुचकता दाखवुन घटनास्थळी आली आणि नाल्यातील अर्भकाला घेऊन पोलिसांनी राजावाडी रुग्णालय गाठलं. तिथं या नवजात अर्भकावर उपचार सुरू आहेत. दरम्यान, अर्भकाची प्रकृती धोक्याची बाहेर असल्याची माहिती मिळत आहे. त्यानंतर पोलिसांनी या नवजात अर्भकासोबतचा फोटो आपल्या ट्विटर हँडलवरून शेयरही केला. पोलिसांनी अर्भकाचा फोटो ट्विट करत लिहिलंय की, ‘एक नवजात अर्भक कपड्यात गुंडाळून नाल्यात फेकले गेले असल्याची माहिती पंतनगर निर्भया पथकाला एका हितचिंतकाकडून मिळाली होती. शेजारच्या मांजरींनी ओरडुन गोंधळ केल्याने ती व्यक्ती सावध झाल्याचे समजले. बाळाला त्वरित राजावाडी रुग्णालयात नेले असून बाळ आता सुरक्षित आहे.
या नवजात अर्भकाला नाल्यात कोणी सोडले याबाबत पोलिसांना अद्याप माहिती मिळू शकलेली नाही. त्याच प्रमाणे या अर्भकाचे आई-वडील कोण आहेत, हे देखील अद्याप स्पष्ट झालेले नाही. या संदर्भात पोलीस तपास करत आहेत. मुंबई पोलिसांनी प्रसंगावधान राखत अर्भकाचे प्राण वाचवल्याबद्दल पोलिसांचे कौतुक तर होत आहेच, मात्र ज्या मांजरींमुळे अर्भक असल्याचे दिसले त्या माजरींची देखील परिसरात चर्चा होत आहे.
