ठाणे- कंपनीत काम देतो असे सांगून एका तरुणांकडून अडीच लाख रुपये उकळले. परंतु या तरुणाला नोकरी मिळाली नाही. तरुणाची फसवणूक केल्याप्रकरणी कांतीलाल नारायण डोंगरे (५६ रा. किसननगर नंबर २) याच्याविरुद्ध राबोडी पोलिस ठाण्यात गुन्हा दाखल करण्यात आला आहे. आरोपीने आणखी दोघांची फसवणूक केल्याची बाब समोर आली आहे.
ठाण्यातील गोकुळनगरमध्ये सतीश मोरे (३१) हा युवक राहतो. तो एका कंपनीत कामाला आहे. एसीसी कंपनीत कामाला लावतो. महिना २५ हजार रुपये पगार मिळेल. मात्र पैसे दिल्याशिवाय नोकरीचे काम होणार नसल्याचे आरोपीने मोरे याला सांगितले. त्यानंतर आरोपीने नियुक्ती पत्रही दाखवले होते. त्यामुळे विश्वास अधिक बसल्याने चांगल्या पगाराच्या या नोकरीकरिता मोरे याने आरोपीला एकूण अडीच लाख रुपये देऊनही नोकरी लागली नाही. फसवणूक झाल्याने मोरे याने आरोपीकडे पैशाची मागणी केली. मात्र आरोपी पैसेही देण्यास टाळाटाळ करू लागला होता. आरोपीने मोरे याच्या दोन मित्राची देखील फसवणूक केली आहे. आरोपीला अद्याप अटक करण्यात आलेले नसून पोलिस उपनिरीक्षक महेश जाधव तपास करत आहेत.
