चाळीसगावात डॉ. बाबासाहेब आंबेडकराचा पुतळा नूतनीकरण करते वेळेस उत्खननात सापडले 2 अस्थी कलश.
डॉ. बाबासाहेब आंबेडकर यांच्या अस्थीकलशला अभिवादन करण्यास समाज बांधवांची गर्दी.
✒विशाल सुरवाडे✒
जळगाव जिल्हा प्रतिनिधी
चाळीसगाव,दि.23 जुलै:- जळगाव जिल्हातील चाळीसगाव शहरातील डॉ. आंबेडकर चौकात भारतरत्न डॉ. बाबासाहेब आंबेडकर यांच्या पुतळ्याचे नूतनीकरण करत असताना उत्खननात पुतळ्याखाली डॉ. बाबासाहेब आंबेडकर यांचे 1958 या वर्षाचे 2 अस्थीकलश मिळाले असून त्या अस्थीकलशाचे दर्शन घेण्यासाठी परिसरातील समाज बांधवांनी मोठी गर्दी केली होती. याठिकाणी तहसीलदार अमोल मोरे, पोलीस निरीक्षक विजयकुमार ठाकूरवाड, साहाय्यक पोलीस निरीक्षक विशाल टकले, निसार सैय्यद, गोपनीय शाखेचे गणेश पाटील, तलाठी यांनी भेट देऊन माहिती घेतली.
जळगाव जिल्हातील चाळीसगाव हे आंबेडकरी चळवळीचे गाव म्हणुन ओळखले जाते. चाळीसगाव शहरात नगरसेविका सायली रोशन जाधव यांच्या प्रयत्नातून डॉ. बाबासाहेब आंबेडकर यांच्या पुतळ्याचे नूतनीकरण सुरू करण्यात आले आहे. हे काम गेल्या अनेक दिवसांपासून त्याठिकाणी सुरू आहे आज दि 22 जुलै रोजी दुपारी डॉ बाबासाहेब आंबेडकर यांच्या पुतळ्याखाली उत्खनन सुरू असतांना जवळपास 10 फूट खाली सिमेंट काँक्रीट मध्ये डॉ. बाबासाहेब आंबेडकर यांची अस्थी असलेले 2 अस्थीकलश मिळून आले ही माहिती नगरसेविका सायली जाधव, रोशन जाधव, समता सैनिक दलाचे धर्मभूषण बागुल, माजी आमदार साहेबराव घोडे, नगरसेवक रामचंद्र जाधव, बबलू जाधव, गौतम जाधव आदी समाज बांधव त्याठिकाणी येऊन विधीवत पूजन करून अस्थीकलश बाहेर काढले एका अस्थी कलशावर इंद्रायणीबाई पुंडलिक वाघ सायगाव व दुसऱ्या कलशावर डॉ. बाबासाहेब आंबेडकर स्मारक समिती चाळीसगाव असा उल्लेख आहे.
यावेळी समता सैनिक दलाचे धर्मभूषण बागुल यांनी सांगितले की त्यांचे वडील स्वातंत्र्य सैनिक भगवान बागुल यांनी एका पेपरचे कात्रण दाखवून माहिती दिली होती की 6 डिसेंबर 1956 रोजी डॉ बाबासाहेब आंबेडकर यांचे महापरिनिर्वाण झाले 9 डिसेंबर रोजी अंत्यसंस्कार झाले व 10 डिसेंबर रोजी क्रांतीसुर्यपुत्र भैय्यासाहेब आंबेडकर यांच्या नेतृत्वात जमलेल्या हजारो लोकांनी तेव्हा मुंडन केले होते त्यात चाळीसगाव येथील शामाजी जाधव, सीताराम चव्हाण व चाळीसगाव येथील भिम अनुयायी यांनी हे अस्थीकलश चाळीसगावी आणले व 1958 साली डॉ बाबासाहेब आंबेडकर यांचा पुतळा झाला त्यावेळी अस्थीकलश पुतळ्याच्या पायथ्याखाली ठेवले होते ते आज उत्खनन करताना मिळून आले आहे हे अस्थीकलश नवीन जागेवर पुतळ्याखाली विधीवत पूजन करून ठेवणार असल्याची माहिती त्यांनी दिली.
