चिखले गावात स्वच्छता ज्योत प्रज्वलन व भव्य रॅलीत ग्रामस्थांचा उत्स्फूर्त सहभाग

चिखले गावात स्वच्छता ज्योत प्रज्वलन व भव्य रॅलीत ग्रामस्थांचा उत्स्फूर्त सहभाग

अरविंद बेंडगा
जिल्हा प्रतिनिधी, पालघर
7798185755

पालघर :- दि. २४ सप्टेंबर २०२५ – “स्वच्छता ही सेवा” अभियान (दि. १७ सप्टेंबर ते २ ऑक्टोबर २०२५) अंतर्गत ग्रामपंचायत चिखले येथे तालुका स्तरीय स्वच्छता ज्योत प्रज्वलन व स्वच्छता रॅली या उपक्रमांचे भव्य आयोजन करण्यात आले. या कार्यक्रमाचे मार्गदर्शन पंचायत समिती डहाणू यांच्या गटविकास अधिकारी मा. पल्लवी सस्ते मॅडम यांनी केले.
कार्यक्रमाची सुरुवात स्वच्छता ज्योत प्रज्वलित करून करण्यात आली. यावेळी ग्रामस्थांना स्वच्छतेचे महत्त्व पटवून देत गावामध्ये जनजागृतीचा संदेश देण्यात आला. त्यानंतर गावातून निघालेल्या रॅलीत ग्रामपंचायत चिखलेचे सरपंच श्री. अभिजित काटेला, उपसरपंच, सदस्य, ग्रामपंचायत अधिकारी, शिक्षक, विद्यार्थी, उमेद (MSRLM) तालुका व्यवस्थापक, स्वच्छ भारत मिशन (ग्रामीण) कक्षाचे प्रतिनिधी, अंगणवाडी सेविका, आशा वर्कर, बचत गट महिला तसेच ग्रामस्थ मोठ्या संख्येने सहभागी झाले.
या प्रसंगी गटविकास अधिकारी मा. पल्लवी सस्ते मॅडम व सरपंच श्री. अभिजित काटेला यांनी मार्गदर्शनपर भाषण केले. त्यांनी अधोरेखित केले की, “स्वच्छता ही केवळ गावाच्या सौंदर्यासाठी नसून आरोग्य, विकास व सामाजिक प्रगतीसाठीही अत्यंत आवश्यक आहे. प्रत्येक नागरिकाने स्वतःपासून सुरुवात करून घर, शाळा, अंगण व सार्वजनिक ठिकाणी स्वच्छतेकडे लक्ष दिल्यास गाव खऱ्या अर्थाने आदर्श ठरेल.”
या उपक्रमाद्वारे ग्रामस्थांमध्ये स्वच्छतेबाबत जागरूकता निर्माण झाली. ग्रामपंचायत, शासकीय विभाग, महिला गट, विद्यार्थी व ग्रामस्थ यांच्या सक्रिय सहभागामुळे कार्यक्रम उत्साहात व यशस्वीरीत्या पार पडला.