ग्राम पुराडा येथे दोन युवक – युवतीचा संशयास्पद मृत्यू झाल्याने गावात हळहळ
मुलगा झाडावर गडफास घेतलेल्या अवस्थेत तर मुलगी झाडाखाली मृत अवस्थेत
✍️ भवन लिल्हारे जिल्हा प्रतिनिधी भंडारा📱 मो.नं.9373472847📞
गोंदिया : दिनांक २३ डिसेंबर २०२३ रोजी गोंदिया जिल्ह्यातील देवरी तालुक्यात सालेकसा पोलीस ठाण्यांतर्गत येणाऱ्या ग्राम पुराडा येथे २२ वर्ष वयोगटातील एक तरूण व एक तरूणी या दोघांचा शनिवार २३ डिसेंबर रोजी मृतदेह आढळला. मुलगा हा झाडावर गळफास घेतलेल्या अवस्थेत आढळला. तर त्याच झाडाखाली मुलगी पडलेल्या अवस्थेत आढळली. त्यांची हत्या की आत्महत्या ही बाब स्पष्ट झाली नसून उत्तरीय तपासणी अहवालानंतर ही बाब स्पष्ट होईल. श्रीकांत महादेव कापगते वय (२२) वर्षे रा. पुराडा ता. देवरी असे मृत मुलाचे नाव आहे. तर टिकेश्वरी सुकलाल मिरी वय (२२) वर्षे रा. हलबीटोला ता. देवरी जि. गोंदिया असे मृत मुलीचे नाव आहे. मृतक श्रीकांतचे वडील विजय महादेव कापगते वय (५२) वर्षे रा. पुराडा ता. देवरी हे २३ डिसेंबर रोजी सकाळी १० वाजता आपल्या शेताकडे पाणी पाहायला गेले.
त्यांच्या शेताच्याच बाजूला असलेले शिवचरन गुनाजी आचले यांच्या शेतात पळसाच्या झाडाला फासावर लटकत असल्याचे दिसून आले. कोण आहे हे पाहण्यासाठी ते जवळ गेले असतांना त्यांचाच मुलगा असल्याचे लक्षात आले. त्या झाडाखालीच एक मुलगी मृतावस्थेत दिसली. लगेच त्यांनी गावचे पोलीस पाटील सुभाष अंबादे यांना भ्रमणध्वनी ने माहिती दिली.
पोलीस पाटील आणि गावकऱ्यांनी घटनास्थळाकडे धाव घेतली. पोलिसांना माहिती देण्यात आली. लगेच काही क्षणातच सालेकसा पोलिसांनी घटनास्थळ गाठून मृतदेह उत्तरीय तपासणी करीता ग्रामीण रुग्णालय सालेकसा येथे नेण्यात आले. त्यांच्या पार्थीवावर उत्तरीय तपासणी सुरू आहे. या घटनेसंदर्भात सालेकसा पोलिसांनी आकस्मीक मृत्यूची नोंद केली आहे. तपास पोलीस निरीक्षक बाबासाहेब बोरसे यांच्या मार्गदर्शनात पोलीस उपनिरीक्षक अजय पाटील करीत आहेत. त्या दोघांचा प्रेम प्रकरण असावा या प्रेम प्रकरणातून त्यांनी आत्महत्या केली असावी अशी चर्चा परिसरात गाजली होती. या खळबळजनक घटनेने परिसरात हळहळ व्यक्त होत आहे.
