📢महाराष्ट्र राज्याचा अंतरिम अर्थसंकल्प 💼 2024 • चंद्रपुर जिल्हयातील राजकीय नेत्यांच्या प्रतिक्रिया

📢महाराष्ट्र राज्याचा अंतरिम अर्थसंकल्प 💼 2024
• चंद्रपुर जिल्हयातील राजकीय नेत्यांच्या प्रतिक्रिया

🖋️ मीडिया वार्ता वृत्तसेवा
📱 8830857351

मुंबई : 27 फेब्रुवारी
राज्य विधिमंडळाचे अर्थसंकल्पीय अधिवेशन सुरू झाले आहे. उपमुख्यमंत्री तसेच अर्थमंत्री अजित पवार यांनी मंगळवार, 27 फेब्रुवारी रोजी राज्याचा अंतरिम अर्थसंकल्प विधानसभेत सादर केला.
जिल्हयातील विविध पक्षीय नेत्यांचा यावर संमिश्र अश्या प्रतिक्रीया बघावयास मिळाल्या.

• सर्वसमावेशक व विकासाला गती देणारा अंतरिम अर्थसंकल्प- हंसराज अहीर
महाराष्ट्र सरकारचे उपमुख्यमंत्री तथा अर्थमंत्री अजित पवार यांनी सादर केलेला सन 2024-25 चा अंतरिम अर्थसंकल्प मोदी सरकारच्या धर्तीवर असून या अर्थसंकल्पातून राज्यातील युवक महिला, गरीब व शेतकऱ्यांचे कल्याण साधणारा हा अर्थसंकल्प असल्याची प्रतिक्रीया पूर्व केंद्रीय गृह राज्यमंत्री तथा राष्ट्रीय मागासवर्गीय आयोगाचे अध्यक्ष हंसराज अहीर यांनी दिली आहे.

• सर्वच घटकांना न्याय देऊन गरिबांच्या कल्याणाचा विचार : सुधीर मुनगंटीवार
महाराष्ट्रातील सर्वच घटकांना न्याय देत गरिबांच्या कल्याणाचा विचार करणारा अर्थसंकल्प महाराष्ट्राचे उपमुख्यमंत्री व अर्थमंत्री अजित पवार यांनी सादर केला असून ‘गरीबोके सन्मान में महाराष्ट्र सरकार पूर्ण शक्ती के साथ मैदान में’, अशी प्रतिक्रिया राज्याचे वने, सांस्कृतिक कार्य व मत्स्यव्यवसाय मंत्री सुधीर मुनगंटीवार यांनी व्यक्त केली.

• राज्यातील सर्व घटकांना न्याय देणारा अर्थसंकल्प : डॉ. अशोक जीवतोडे
• १ ट्रिलीयन डॉलर अर्थव्यवस्था करण्यासाठी राज्य सरकारची वाटचाल स्तुत्य
राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री तथा अर्थमंत्री अजित पवार यांच्या त्रिसुत्रीतून तयार झालेला हा अंतरिम अर्थसंकल्प राज्याला विकासाच्या दिशेने नेणारा आहे,
• असे मत भारतीय जनता पार्टीचे ओबीसी मोर्चाचे महाराष्ट्र राज्य प्रदेश उपाध्यक्ष डॉ. अशोक जीवतोडे यांनी व्यक्त केले आहे.

• राज्याच्या शाश्वत, पर्यावरणपूरक, सर्वसमावेशक विकासाला गती देणारा अर्थसंकल्प – आ. किशोर जोरगेवार
राज्याचे अर्थमंत्री अजित पवार यांनी सादर केलेल्या अर्थसंकल्पात शेतकरी, कष्टकरी, महिला, विद्यार्थी, युवक, मागासवर्गीय, आदिवासी, अल्पसंख्याक, उद्योजग, व्यापारी अशा घटकांना न्याय देण्याचा प्रयत्न करण्यात आला असून हा अर्थसंकल्प राज्याच्या शाश्वत, पर्यावरणपूरक, सर्वसमावेशक विकासाला गती देणारा असल्याचे अर्थसकंल्पावर प्रतिक्रिया देतांना आमदार किशोर जोरगेवार म्हणाले.

• शाळांचा विकास आणि शैक्षणिक क्षेत्राकडे दुर्लक्ष करणारा “बजेट” – आ. सुधाकर अडबाले
आज सादर केलेल्या अर्थसंकल्पात शैक्षणिक क्षेत्रासाठी कोणतीही भरीव तरतूद करण्यात आलेली नाही. शाळांचा विकास आणि शैक्षणिक सुविधांसाठीही या अर्थसंकल्पात अंतर्भाव दिसून येत नाही. अंशत: अनुदानित शाळांना टप्पा अनुदान वाढ देण्यात आले नाही. शिक्षक – कर्मचाऱ्यांच्या भविष्याचा प्रश्न असलेल्या जुन्या पेंशनबाबत कोणतेही ठोस पाऊल उचलण्यात आलेले नाही. आय टी शिक्षकांना नियमित वेतन श्रेणी लागू करण्याबाबत कुठलीही तरतूद या अर्थ संकल्पात करण्यात आलेली नाही.

• अर्थसंकल्पात प्रदूषण तसेच शासकीय शाळांच्या प्रगतीसाठी कुठलीही तरतूद नाही – राजेश बेले
अंतरिम अर्थसंकल्पात अर्थमंत्री अजित पवार यांनी शाश्वत, पर्यावरणपूरक, सर्वसमावेशक विकास साधण्याच्या राज्याच्या धोरणाला गती देण्यास प्राधान्य दिले. मात्र, चंद्रपूरसारख्या प्रदूषित जिल्ह्यासाठी शुद्ध हवा, पर्यावरण, इरई नदी खोलीकरण आणि पूरग्रस्त स्थिती कायमस्वरूपी दूर करण्यासाठी कोणतीही ठोस तरतुद करण्यात आली नाही. या शिवाय राज्यातील शासकीय शाळांच्या प्रगतीसाठी कोणतीही निधीची तरतूद नाही. त्यामुळे गरीब विद्यार्थ्याची पिळवणूक होईल.