जादुटोण्याच्या संशयावरून इंजिनीअर तरुणाला खुर्चीला बांधून जिवंत जाळले, पत्नीला अटक
जादुटोण्याच्या संशयावरून इंजिनीअर तरुणाला खुर्चीला बांधून जिवंत जाळल्याची घटना तेलंगणातील जोगतियाल जिल्ह्यातील बलवंतपूरमध्ये घडली. या प्रकरणी पत्नी आणि सासरच्या सहा जणांना अटक केली आहे.
हैदराबाद:- हैदराबादमध्ये धक्कादायक घटना घडली आहे. एका सॉफ्टवेअर इंजिनीअर तरुणाला खुर्चीला बांधून जिवंत जाळण्यात आले. या प्रकरणी पत्नीसह सासरकडील सहा ते सात जणांना अटक करण्यात आली आहे. जादूटोणा आणि मेहुण्याच्या मृत्यूला कारणीभूत ठरल्याच्या संशयावरून तरुणाला जाळून ठार मारण्यात आल्याचे सांगण्यात येत आहे.
तेलंगणातील जागतियालमधील बलवंतपूर गावात सोमवारी रात्री ही धक्कादायक घटना घडली. पवन कुमार असे मृताचे नाव आहे. या प्रकरणी मंगळवारी त्याच्या पत्नीसह सासरचे सहा जण आणि त्यांच्या एका मित्राला अटक करण्यात आली आहे. पवनची पत्नी कृष्णावेनी हिलाही अटक केली आहे. पवन कुमारला त्याचा मेहुणा जगनच्या घरात खुर्चीला बांधले आणि त्यानंतर त्याला पेटवून दिले, अशी माहिती पोलिसांनी दिली.
पोलिसांच्या माहितीनुसार, पवन कुमार जादूटोणा करत असल्याचा संशय त्यांना होता. त्याची पत्नी कृष्णावेनीचा भाऊ जगन याचा १२ दिवसांपूर्वी हृदयविकाराने मृत्यू झाला होता. त्याच्या मृत्यूला पवन कारणीभूत असल्याचा संशय त्यांना होता. कोणत्या तरी कारणावरून पवन आणि सासरच्या मंडळींमध्ये वाद झाला होता. त्यावेळी पवनने जगनला ठार मारण्याची धमकी दिली होती, अशी माहिती प्राथमिक चौकशीतून उघड झाली आहे. जादूटोणा करून पवन आपल्याला इजा पोहोचवणार असल्याचा संशय जगनच्या पत्नीला होता. जगनच्या मृत्यूनंतर त्याची पवननेच हत्या केल्याचा संशय तिने व्यक्त केला होता.
सोमवारी पवन जगनच्या घरी गेला होता. त्यावेळी जगनची पत्नी सुमलता हिने कृष्णवेनीला आतून दरवाजा लावून घेण्यास सांगितले. त्यानंतर दुसऱ्या एका महिलेच्या मदतीने त्यांनी पवनला खुर्चीला बांधले. त्याच्यावर पेट्रोल ओतून जाळले. कृष्णवेनीने पोलिसांना सांगितले की, घरातून धूर येत असल्याचे दिसले. तसेच पवनच्या किंचाळ्या ऐकू आल्या. तिने तातडीने धाव घेतली आणि घराचा दरवाजा उघडला. मात्र, धुराचे लोट येत असल्याने घरात प्रवेश करू शकली नाही.
या घटनेची माहिती मिळताच पोलीस तेथे पोहोचले. त्यांनी पवनचा मृतदेह विच्छेदनासाठी जोगतियाल येथील रुग्णालयात नेला. पोलिसांनी या प्रकरणी गुन्हा दाखल केला. पोलिसांनी पवनची पत्नी आणि सासरकडील सहा जणांना अटक केली असून, त्यांची चौकशी केली जात आहे.
