मुंबई:दीपिका पादुकोण आणि रणबीर कपूर याची मैत्री ब्रेकअपनंतर देखील कायम आहे. इतकंच नव्हे, रणबीरच्या पालकांशी अर्थात नीतू आणि ऋषी कपूर यांच्याशीदेखील दीपिकाचे चांगले संबंध आहेत. याचा प्रत्यय पुन्हा एकदा आलाय. ‘आम्हाला दीपिकाचा अभिमान आहे,’ असं म्हणत या जोडीनं लेकाच्या एक्स गर्लफ्रेन्डचं भरभरून कौतुक केलंय.
वादाच्या भोवऱ्यात अडकलेला ‘पद्मावत’ अखेर प्रदर्शित झाला आणि अनेक बॉलिवूडकरांनी चित्रपटाचं आणि कलाकारांचं कौतुक केलं. या चित्रपटाच्या स्पेशल शोसाठी नीतू आणि ऋषी कपूर यांनी हजेरी लावली होती. चित्रपटातील राणी ‘पद्मिनी’ अर्थात, दीपिकाच्या कामानं भारावलेल्या या दोघांनी तिला हटके शुभेच्छा दिल्या. थेट पुष्पगुच्छ पाठवून त्यांनी दीपिकाला तिच्या कामाची पोचपावती दिलीय. ‘तुझं काम मनापासून आवडलं. आम्हाला तुझा अभिमान वाटतो,’ असा संदेशही त्यासोबत लिहिलाय. खुद्द दीपिकानंच हा फोटो सोशल मीडियावर शेअर करत या दोघांचे आभार मानलेत.
