मुसळधार पावसात एस. टी.बस पुलावरुन थेट पाण्यात कोसळली.
उमरखेड तालुक्यातील दहेगाव नाल्यावर घडली घटना
उमरखेड तालुक्यातील दहेगाव नाल्यावर घडली घटना
साहिल महाजन
मीडिया वार्ता न्यूज
यवतमाळ प्रतिनिधी
7262025028
पुसद-उमरखेड रस्त्यावरील दहागाव पुलावरून पाणी वाहत असताना रस्त्याचा अंदाज न आल्याने बस पुलावरून नाल्यात कोसळली. यात दोन प्रवाशांचा मृत्यू झाला असून बस चालकासह काही प्रवासी बेपत्ता असल्याचे वृत्त आहे. ही घटना दिनांक २८.९.२०२१ मंगळवार रोजी सकाळी घडली.
ही बस नागपूरहून नांदेडकडे जात असताना यवतमाळ जिल्ह्यातील उमरखेड शहरापासून काही अंतरावर ही दुर्घटना घडली असल्याची माहिती समोर येत आहे. स्थानिक लोकांच्या मोबाईलच्या कॅमेऱ्यात ही संपूर्ण घटना कैद झाली आहे.
मागील दोन दिवसांपासून यवतमाळ जिल्ह्यात सतत पाऊस सुरू आहे. त्यामुळे नदी, नाले ओसंडून वाहत आहेत. अशातच मंगळवारी सकाळी नागपूर आगाराची एम.एच. १४ बी.टी.५०१८ या क्रमांकाची बस उमरखेड येथून काही प्रवासी घेऊन नागपूरकडे निघाली होती.नदीवरुन पाणी वाहत असताना एस.टी.बस चालकाने नको ते धाडस करत प्रवाशांचा जीव धोक्यात घालून या पुलावरुन पाणी वाहत असतानाही चालकाने त्या पाण्यातून बस नेण्याचा प्रयत्न केल्याने पाण्याच्या प्रवाहात ही बस वाहून गेली. या अपघाताचे दोन व्हिडीओ समोर आले आहेत. एका व्हिडीओत एस.टी.बस थेट पाण्यात वाहून जात असताना दिसत आहे. तर दुसऱ्या व्हिडीओत बसमधील प्रवासी आपले प्राण वाचवण्यासाठी धडपड करत असताना दिसत आहेत. या बसमध्ये चालक, वाहकासह तीन प्रवाशी होते. बसमधील काही प्रवाशी बसच्या टपावर अडकलेले असून मदतीसाठी हाक देत आहेत. तर
दोन प्रवाशांचा मृत्यू झाला असून चालकासह काही प्रवाशी बेपत्ता असल्याची माहिती मिळली आहे. परंतु , वृत्त लिहेपर्यंत प्रशासनाकडून कोणतीही अधिकृत माहिती प्राप्त झाली नाही.
मिळालेल्या प्राथमिक माहितीनुसार, घटनास्थळी तहसीलदार व पोलीस निरीक्षक पोहचून स्थानिक ग्रामस्थच्या मदतीने मदत आणि बचावकार्य सुरू आहे. तीन प्रवाशांना सुखरूप बाहेर काढण्यात आले आहे. मात्र, अद्याप एस.टी. चालक आणि वाहक यांची माहिती मिळू शकलेली नाही.
गेल्या दोन दिवसांपासून यवतमाळ जिल्ह्यात मुसळधार पाऊस पडत आहे. या मुसळधार पावसामुळे नद्या-नाल्यांना पूर आला आहे. नद्या ओसंडून वाहत असल्याने वाहतुकीवर परिणाम होत असताना दिसत आहे. रस्त्याच्या दोन्ही बाजुला वाहनांच्या रांगा लागल्याने प्रशासकीय अधिकाऱ्यांनाही घटनास्थळी पोहोचण्यात अडचणी येत आहेत.
