कर्जत निवडणूक प्रकरण सर्वोच्च न्यायालयात
पराभूत उमेदवार सुधाकर घारे यांचे सुप्रीम कोर्टात अपील
आमदारकी टिकवण्यासाठी महेंद्र थोरवे पुन्हा सज्ज
संदेश साळुंके
कर्जत रायगड प्रतिनिधी
९०१११९९३३३
कर्जत :- कर्जत विधानसभा मतदारसंघातील पराभूत अपक्ष उमेदवार व राष्ट्रवादी काँग्रेस पक्षाचे रायगड जिल्हा अध्यक्ष सुधाकर घारे यांनी मुंबई उच्च न्यायालयाच्या निकालाविरुद्ध सर्वोच्च न्यायालयात धाव घेतली आहे. नुकतेच उच्च न्यायालयाने विद्यमान आमदार महेंद्र थोरवे यांच्या बाजूने निकाल देत घारे यांची याचिका फेटाळली होती. या निर्णयाविरोधात घारे यांनी आता सर्वोच्च न्यायालयात अपील दाखल केले आहे.
कर्जत विधानसभा निवडणुकीत काही हजार मतांनी पराभूत झाल्यानंतर सुधाकर घारे यांनी उच्च न्यायालयात निवडणूक निकालाला आव्हान दिले होते. आपल्या याचिकेत त्यांनी आरोप केला होता की, आमदार थोरवे यांनी मतदारांना भडकावले, धमकावले तसेच “सुधाकर घारे” या नावाचा डमी उमेदवार उभा करून त्यांचा पराभव घडवून आणला. या गंभीर आरोपांवर गेल्या सहा महिन्यांपासून मुंबई उच्च न्यायालयात सुनावणी सुरू होती. मात्र अखेर न्यायालयाने आमदार थोरवे यांच्या आमदारकीला मान्यता देत घारे यांची याचिका फेटाळली.
न्यायालयाचा निकाल आपल्या विरोधात लागल्यानंतर सुधाकर घारे अधिक आक्रमक झाले आहेत. त्यांनी सर्वोच्च न्यायालयात अपील दाखल करताना सांगितले की, “आपला विजय उशिरा का होईना पण होणारच. न्यायालयावर माझा पूर्ण विश्वास आहे. सत्याच्या लढाईत मी मागे हटणार नाही.” उच्च न्यायालयात त्यांच्या वतीने वरिष्ठ वकील अ‍ॅड. आरिफ बुकवाला, अ‍ॅड. महेश बुकवाला आणि अ‍ॅड. पूजा थोरात यांनी बाजू मांडली होती. मात्र सर्वोच्च न्यायालयात त्यांच्यासाठी कोणते नामांकित वकील काम पाहणार हे अद्याप स्पष्ट झालेले नाही.
दरम्यान, या अपीलमुळे कर्जत मतदारसंघात नव्या घडामोडींना उधाण आले आहे. एकीकडे महेंद्र थोरवे यांच्या आमदारकीला न्यायालयीन आधार मिळाल्याने त्यांचा आत्मविश्वास वाढला आहे, तर दुसरीकडे घारे यांनी सर्वोच्च न्यायालयात दिलेले आव्हान आगामी राजकीय वातावरण तापवणारे ठरण्याची शक्यता व्यक्त केली जात आहे.
