कोल्हापूर – मंगळवारपेठ परिसरातील बेलबाग येथे शनिवारी (ता. २७) मध्यरात्री तीन वाहनांसह सेंट्रिंगच्या साहित्याला आग लागली. यात सात लाख रुपयांचे नुकसान झाले असून, अग्निशामक दलाच्या तीन बंबांनी आग आटोक्यात आणली. जुना राजवाडा पोलिस ठाण्यात घटनेची नोंद झाली आहे. आगीचे नेमके कारण अद्याप स्पष्ट झालेले नाही.
जुना राजवाडा पोलिसांनी सांगितलेल्या माहितीनुसार, रवींद्र वसंतराव खिरुगडे (वय ५२, रा. बेलबाग, मंगळवार पेठ) यांचा सेंट्रिंगचा व्यवसाय आहे. त्यांनी सेट्रिंगसाठी लागणाऱ्या लाकडी फळ्या, बांबू, प्लायवूड असे सुमारे दोन लाख रुपये किंमतीचे साहित्य स्वयंवर मंगल कार्यालयाच्या पिछाडीस असलेल्या रिकाम्या जागेत ठेवले होते. या साहित्याला शनिवारी मध्यरात्री अचानक आग लागली. साहित्याशेजारी गणेश सावंत, अभिजित पाटील यांच्या दोन कार, तर संजय खारुगडे यांची अॅपे रिक्षा पार्किंग केली होती.
या वाहनांनीही पेट घेतला. परिसरातील नागरिकांना हा प्रकार लक्षात येताच त्यांनी अग्निशामक दलास कळवले. काही वेळात जवान रघुनाथ साठे, दिगंबर केदारी, पवन कांबळे, संदीप पाटील, विशाल परीट, प्रमोद मोरे, चंद्रकांत वासुदेव, कृष्णात साठे, गिरीष गवळी घटनास्थळी दाखल झाले. त्यांनी तीन बंबाद्वारे पाण्याचा फवारा मारुन आग विझवली. सेट्रिंगचे पूर्ण साहित्य आगीच्या भक्ष्यस्थानी पडले, तर दोन्ही कार व रिक्षाचा काही भाग जळाला आहे. यात सुमारे सात लाख रुपयांचे नुकसान झाले. जुना राजवाडा पोलिस ठाण्यात याची नोंद झाली आहे.
