जिग्नेश मेवाणी बनणार गुजरातचे ‘पॅडमॅन’
अहमदाबाद:- दलित कार्यकर्ते आमदार जिग्नेश मेवानी गुजरातचे ‘पॅडमॅन’ बनण्याच्या तयारीत आहेत. जागतिक महिला दिनानिमित्त आपल्या मतदारसंघातील महिलांसाठी मेवानी यांनी सॅनिटरी पॅड्सचं उत्पादन करण्याची योजना आखली आहे. पालनपूर जिल्ह्यातील वडगाम या आपल्या मतदारसंघातल्या महिलांना ते पॅड्सचं वाटप करणार आहेत. वडगाममध्ये महिलांना रोजगार मिळवून देईल असं सॅनिटरी पॅडचं प्रोडक्शन युनिट सुरू करण्याचा प्रयत्न असल्याचेही मेवानी म्हणाले.
स्वस्त दरात सॅनिटरी पॅड महिलांना कसे उपलब्ध होतील, याच्या शक्यता पडताळून पाहत असल्याचे त्यांनी सांगितले. ते म्हणाले, ‘वडगाममध्ये आम्ही 7 मार्चला हा प्रकल्प सुरू करणार आहोत. मासिक पाळीच्या वेळी महिलांना थोडा तरी दिलासा मिळावा, त्यांचे आरोग्य चांगले राहावे, हा यामागचा उद्देश आहे. स्वातंत्र्यानंतर इतकी दशके उलटल्यानंतरही ग्रामीण भागातील महिला मासिक पाळीच्या वेळी सिंथेटिक कापड वापरतात. आम्ही इको फ्रेंडली कापसापासून बनवलेले सॅनिटरी पॅड त्यांना देणार आहोत. तसंच वैद्यकीय तज्ज्ञांच्या मदतीने पॅड बनवण्याचे शिवणयंत्र महिलांना देण्याचा विचार आहे, जेणेकरून स्वत:ला लागणारे पॅड्स त्या स्वत:च तयार करतील. ‘सॅनिटरी नॅपकिन देण्याबाबतची कल्पना कशी सुचली हे सांगताना मेवाणी म्हणाले, ‘आपण ज्या पुरुषप्रधान समाजात राहतो, तेथे महिलांच्या आरोग्याचे प्रश्न कायम दुर्लक्षिलेले राहतात. मासिक पाळी नैसर्गिक असूनही त्याबद्दल उघडपणे बोललं जात नाही. सार्वजनिक आरोग्य, शिक्षण, संस्कृती आणि जातीव्यवस्थादेखील महिलांना मासिक पाळीच्या काळात अस्पृश्य समजतात. म्हणून मी ठरवलं की या अस्पृश्यतेच्या विषयासाठी देखील काम करायचं.’
Post Views: 57
