उदघाटनाची घाई ? इस्पितळात काहीच नाही.
सचिन पवार
: माणगांव तालुका प्रतिनिधी
८०८००९२३०१
माणगांव : तळा शहरातील रुग्णालयाच्या वास्तूचे उदघाटन पालकमंत्री अदिती तटकरे यांच्या हस्ते करण्यात आले. या कार्यक्रमाचे नियोजन काही तास आधी करण्यात आल्याचे बोललं जात आहे. या कार्यक्रमाचे नियोजन करण्यासाठी कार्यकर्त्यांची आणि शासकीय यंत्रणेची पक्की धांदल उडाली. विशेष म्हणजे महागाव आणि मांदाड येथील इस्पितळाची व्यवस्था देखील अपूर्णच आहे. शासनाने या दोन्ही रुग्णालयासाठी कोट्यवधी रुपये खर्च केला आहे. पण या दोन्ही इस्पितळात पुरेसा कर्मचारी वर्ग नसल्याने त्याचा फारसा उपयोग रुग्णांना होताना दिसत नाही.
तळा येथील इस्पितळाचे चित्र देखील काही वेगळं नाही. काल दिनांक २८/०६/२०२२ रोजी या इस्पितळाच्या वास्तूचे उदघाटन करण्यात आले. मात्र या इस्पितळात कर्मचारी तर नाहीच मात्र इस्पितळाला लागणारी इतर साधने देखील नाहीत. उदघाटन प्रसंगी कार्यक्रमाच्या ठिकाणी बॅनर लावण्यात आला होता त्या ब्यानरवर स्पष्टपणे लिहिलं होत ग्रामीण रुग्णालय तळा तालुका तळा उदघाटन सोहळा. म प्रश्न असा उपस्थित होतो कि इस्पितळात कर्मचारी वर्ग नाही साधन सामुग्री नाही म इतकी उदघाटनाची घाई का बर करण्यात आली ? सध्याची राजकीय अस्थिर परिस्थिती पाहता हा अचानक निर्णय तर नाही ना घेण्यात आला ? अशी चर्चा सुरु आहे. आज मात्र इस्पितळाच्या आवारात पूर्ण पणे भयाण शांतता आहे. संपूर्ण रिकाम्या असलेल्या इस्पितळाला टाळे देखील लावण्यात आले आहे.
इस्पितळाचे काम देखील आहे अपूर्ण आहे जितकं काम पूर्ण झालं आहे त्या सर्व खोल्या देखील रिकाम्या आहेत. सर्व खोल्यांच्या बाहेर पाट्या लावण्या आल्या आहेत मात्र आत मध्ये साधी एक प्लॅस्टिकची खुर्ची देखील नाही. हि सर्व कामे पूर्ण करून इस्पितळ लवकरात लवकर सुरु करण्यात यावे अशी तळमळीची मागणी तळा तालुक्यातील नागरिक करीत आहेत.
काल घाईगडबडीत करण्यात आलेल्या इस्पितळाच्या उदघाटन कार्यक्रम सुरु असतानाच तळा येथील पत्रकारांनी एकत्रित येऊन कार्यक्रमाचे नियोजन बघता काढता पाय घेतला. पत्रकारांनी जेव्हा उदघाटनाची माहिती शासकीय यंत्रणेला विचारली तेव्हा हा प्रश्न विचारल्यावर नक्की काय उत्तर देयचे असा प्रश्न संबंधित शासकीय यंत्रणेला पडला होता. मग काही वेळाने विचार करून त्यांच्या कडून असे सांगण्यात आले कि हे इस्पितळाचे उदघाटन नाही तर हे इमारतीचे उदघाटन आहे. लवकरच इस्पितळ सुरु करून आम्ही नागरिकांना एक उत्कृष्ट आरोग्य सेवा उपलब्ध करून देणार आहोत.
