फरिदाबाद : आजीने तिला एका तरुणाला केवळ पाच हजारात विकले…त्यानंतर या तरुणाने तिच्यावर दोन वर्ष बलात्कार केला…तिला घरकामाल जुंपले आणि त्यातून मिळणारे तिचे पैसेही हडप केले…त्यानंतर पुन्हा तिची ३० हजारात विक्री केली…झारखंडच्या एका अल्पवयीन मुलीची ही कहानी. चाइल्ड लाइनच्या सुचनेवरून पोलिसांनी धीरज नगरमध्ये रविवारी सकाळी छापा मारून तिची सुटका केली आणि तिने आसवांना वाट मोकळी करून देत तिची कहानी पोलिसांसमोर कथन केली. त्यामुळे पोलीसही हादरून गेले…
या मुलीला तिच्या आजीने सुरेंद्र नावाच्या तरुणाला पाच हजारात विकले होते. त्यानंतर सुरेंद्र तिला दिल्लीत घेऊन आला. पीडित मुलीने तब्बल दोन वर्ष सुरेंद्रच्या घरी राहून घरकामं केली. या काळात त्याने तिच्यावर वारंवार बलात्कारही केला. त्यानंतर काही दिवसापूर्वी सुरेंद्रने तिला ३० हजार रुपयांत मिश्रा नावाच्या तरुणाला विकल्यानंतर मिश्रा तिला फरिदाबादला घेऊन आला. त्यानंतर या दोघांनीही फरिदाबादमध्येही तिच्यावर बलात्कार केला.
चाइल्ड लाइनच्या हेल्पलाइनवर शनिवारी रात्री पोलिसांना एक फोन आला होता. त्यानंतर चाइल्ड लाइनचं एक पथक सेक्टर-३१ मधील पोलीस ठाण्यात हजर झालं. त्यांनी या मुलीची माहिती पोलिसांना दिली. त्यामुळे पोलिसांनी धीरज नगरच्या टी-२ कॉलनीत जाऊन या १५ वर्षीय मुलीची सुटका केली. त्यानंतर तिला उपचारासाठी रुग्णालयात दाखल करण्यात आले असून आरोपींवर पोक्सा अंतर्गत गुन्हे दाखल करण्याची प्रक्रिया पोलिसांनी सुरू केली आहे. आरोपींना ताब्यात घेण्यासाठी पोलिसांनी एक स्पेशल पथक स्थापन तयार केलं असून हे पथक झारखंडला रवाना झालं आहे.
