मुंबई ३०/०८/२०२० :- कोविड-१९ साथ रोगाच्‍या प्रादुर्भावामुळे उद्भवलेल्‍या संसर्गजन्‍य परिस्थितीचा विचार करता यावर्षीचा गणेशोत्‍सव अत्‍यंत साध्‍या पद्धतीने साजरा करण्‍याबाबतचे आवाहन बृहन्मुंबई महानगरपालिका व शासनस्‍तरावरुन वेळोवेळी नागरिकांना करण्यात आले आहे. या अनुषंगाने बृहन्मुंबई महानगरपालिका क्षेत्रातील नागरिकांनी गणेशोत्‍सव – २०२० साजरा करताना विसर्जनादरम्‍यान पालन करावयाच्‍या आवश्‍यक सूचना यापूर्वी वेळोवेळी विविध माध्यमाद्वारे देण्यात आलेल्या आहेत. महापालिकेची सर्व ती यंत्रणा श्री.गणेशाच्या विसर्जनासाठी सुसज्ज असून पालिकेने ४४५ विसर्जन स्थळे निश्चित केली आहेत . यासाठी सुमारे २३ हजार कर्मचारी तैनात ठेवण्यात आले आहेत.
बृहन्मुंबई महापालिका क्षेत्रातील श्री गणेश मूर्ती विसर्जन स्थळांची आकडेवारी पुढील प्रमाणे आहे.
*कृत्रिम तलाव संख्या-१६८ , मूर्ती संकलन केंद्र- १७०, फिरती विसर्जन स्थळे -३७, नैसर्गिक विसर्जन स्थळे -७० एकूण विसर्जन स्थळे ४४५*
*महापालिकेद्वारे विसर्जन स्थळावर पुरविण्यात आलेल्या सुविधा*
स्टील प्लेट -८९६ ,
नियंत्रण कक्ष -७८,
जीव रक्षक -६३६,
मोटर बोट -६५,
प्रथम उपचार केंद्र -६९, रुग्णवाहिका संख्या- ६५, स्वागतकक्ष -८१ ,
तात्पुरती शौचालय- ८४,
निर्माल्य कलश -३६८
निर्माल्य वाहन /डंपर/ टेम्पो- ४६७(तसेच आवश्यकतेनुसार त्या त्या भागात वाहन व्यवस्था करण्यात आली आहे)
फ्लड लाईट – २७१७
सर्च लाईट -८३
विद्युत व्यवस्था- आवश्यकतेनुसार
संरक्षण कठडे -आवश्यकतेनुसार
निरीक्षण मनोरे- ४२
जर्मन तरफा -४५
मनुष्यबळ(कर्मचारी)- १९५०३
मनुष्यबळ (अधिकारी)- ३९६९
असे एकूण-२३४७२ अधिकारी-कर्मचारी तैनात असणार आहेत. मागील वर्षाच्या तुलनेत अधिकारी-कर्मचारी व अन्य कामगार यांची संख्या यावर्षी तिप्पट करण्यात आली आहे.
*महापालिकेतर्फे श्री. गणेश विसर्जन प्रसंगी करण्यात आलेले आवाहन*
• घरगुती गणेशोत्‍सव साजरा करणा-या भाविकांनी गणेशमूर्तीचे विसर्जन शक्‍यतो घरच्‍या-घरी बादलीत किंवा ड्रममध्‍ये करावे.
• मुंबई शहरात एकूण ७० नैसर्गिक विसर्जन स्थळे आहेत. या नैसर्गिक विसर्जन स्‍थळांवर नागरिकांना किंवा सार्वजनिक गणेशोत्‍सव मंडळांच्‍या कार्यकर्त्‍यांना थेट पाण्‍यात जावून मूर्ती विसर्जन करण्‍यास प्रतिबंध आहे.१ ते २ कि. मीटर अंतरातील गणेश भक्ताने यांच्या मूर्तीचे विसर्जन नैसर्गिक विसर्जन स्थळी उपलब्ध असलेल्या महापालिकेच्या कर्मचाऱ्यांकडे आपल्या मूर्ती विसर्जनासाठी द्यावयाचे आहे.
• नैसर्गिक विसर्जन स्‍थळांवर महापालिकेद्वारे अतिरिक्‍त मनुष्यबळ देवून मूर्ती संकलनाची शिस्‍तबद्ध व्यवस्था उपलब्ध करुन देण्यात आली आहे.
• नैसर्गिक विसर्जन स्‍थळांवरील गर्दी कमी होण्‍यासाठी महापालिकेच्या २४ विभागांमध्‍ये सुमारे १६८ कृत्रिम तलावदेखील निर्माण करण्यात आले आहेत. कृत्रिम तलावालगत राहणा-या भाविकांना नैसर्गिक विसर्जन स्‍थळांवर जाण्‍यास मनाई असल्‍याने सदर कृत्रिम तलावाचा वापर लगतच्‍या भाविकांनी करणे बंधनकारक आहे.
• महापालिकेच्या प्रत्‍येक विभागांतर्गत ७ ते ८ गणेशमूर्ती संकलन केंद्रे निर्माण करण्यात आली आहेत. त्‍याची माहिती तसेच कृत्रिम तलावांची माहिती पत्‍त्‍यासह तसेच गुगल लोकेशनसह महापालिकेच्या https://portal.mcgm.gov.in या संकेत स्थळावर उपलब्ध आहे.
• प्रतिबंधित क्षेत्र (containment zone) मध्‍ये असणा-या सार्वजनिक गणेशोत्‍सव मंडळाच्‍या मूर्तीचे विसर्जन मंडपातच करावयाचे आहे किंवा विसर्जन पुढे ढकलावयाचे आहे. सिल्‍ड इमारतींमधील (sealed building) गणेशमूर्तीचे विसर्जनासाठी घरीच व्यवस्था करावयाची आहे, याची कृपया नोंद घ्‍यावी.
• मूर्ती संकलन केंद्रावर, कृत्रिम तलावांवर किंवा नैसर्गिक विसर्जन स्‍थळांवर उपलब्ध महापालिकेच्या व्‍यवस्‍थापनाकडे मूर्ती सुपूर्द करण्‍यापूर्वी मूर्तीची यथासांग पूजा व आरती घरीच किंवा मंडळाच्‍या मंडपातच करुन घेणे बंधनकारक आहे.
• महापालिकेने विशेष व्यवस्था म्‍हणून ट्रकवर टाक्‍या किंवा इतर व्यवस्था करुन फिरती विसर्जन स्थळे (mobile spots on wheel) निर्माण केलेली आहेत, त्‍याचाही लाभ भाविकांनी घ्‍यावा.
• २०२० गणेशोत्‍सवा दरम्‍यान कोणत्‍याही मिरवणुकीस परवानगी नाही, याची देखील भाविकांनी नोंद घ्‍यावी.
• विसर्जना दरम्‍यान सामाजिक दूरीकरण अंतर (social distancing), मास्‍क/मुखपट्टी, सॅनिटायझर वापरणे इत्‍यादी आरोग्‍य संबंधित नियमांचे काटेकोरपणे पालन करावे, असे आवाहन महापालिका प्रशासनाद्वारे करण्यात येत आहे.
===
