‘दिलखुलास’ कार्यक्रमात राज्यमंत्री शंभूराज देसाई यांची मुलाखत
मुंबई, दि. १६ – माहिती व जनसंपर्क महासंचालनालय निर्मित ‘दिलखुलास’ कार्यक्रमात ‘ विकासाभिमुख निर्णय ‘ या विषयावर गृह (ग्रामीण), वित्त, नियोजन, राज्य उत्पादन शुल्क, कौशल्य विकास, रोजगार व उद्योजकता आणि पणन राज्यमंत्री शंभूराज देसाई यांची विशेष मुलाखत प्रसारित होणार आहे. ही मुलाखत राज्यातील आकाशवाणीच्या सर्व केंद्रांवरून मंगळवार दि. १७ व बुधवार दि. १८ नोव्हेंबर रोजी सकाळी ७.२५ ते ७.४० या वेळेत प्रसारित होईल. तसेच न्यूज ऑन एअर (newsonair) या ॲपवर याच वेळेत ही मुलाखत ऐकता येईल. निवेदक नरेंद्र बेडेकर यांनी ही मुलाखत घेतली आहे.
या मुलाखतीत कोरोना काळात गृह विभागातर्फे करण्यात आलेल्या विविध उपाययोजना, सध्याच्या काळात राज्याची आर्थिक घडी बसवताना आलेली आव्हाने, कोरोना काळात बेरोजगारांना रोजगार उपलब्ध होण्यासाठी केलेले प्रयत्न, महास्वयम पोर्टल याविषयीची सविस्तर माहिती राज्यमंत्री शंभूराज देसाई यांनी दिली आहे.
