घुग्घूस नगरपरिषदेचे नाव प्रधानमंत्री आवास (शहरी) योजनेमध्ये समाविष्ट करा – आ. किशोर जोरगेवार
अश्विन गोडबोले
चंद्रपूर जिल्हा प्रतिनिधी
मो: 8830857351
घुग्गुस : 14 जुलै
७० हजार लोकवस्ती असलेल्या घुग्घुस नगरपरिषदेचे नाव प्रधानमंत्री आवास (शहरी) योजनेमध्ये समाविष्ट करण्यात यावे अशी मागणी आमदार किशोर जोरगेवार यांनी मुख्यमंत्री एकनाथ शिंदे यांची मुंबई मंत्रालय येथे भेट घेत केली. या मागणी बाबत यावेळी सकारात्मक चर्चा झाली.
घुग्घूस शहराच्या विकासासाठी आमदार किशोर जोरगेवार यांचे सातत्याने प्रयत्न सुरु आहे. या भागाच्या प्रलंबीत विकासकामांसाठी विविध विभागाअंतर्गत मोठा निधी त्यांनी उपलब्ध करुन दिला. यातील अनेक कामे प्रगतीपथावर आहेत तर काही कामे प्रस्तावीत आहे.
• मुख्यमंत्री एकनाथ शिंदे यांची भेट घेत केली मागणी
चंद्रपूर जिल्हयाअंतर्गत घुग्गुस गावातील वाढती लोकसंख्या व जलद गतीने होणारे नागरीकरण यामुळे ग्रामपंचायतचे रूपांतर करून दिनांक ३१ डिसेंबर २०२० रोजी नवनिर्मीत घुग्घूस नगरपरिषदेची स्थापना करण्यात आली आहे. घुग्घूस शहर हे चंद्रपूर जिल्ह्यातील एक औद्योगिक नगर असून येथे मोठ्या प्रमाणात कोळसा खाणी, लोह शुद्धीकरण प्रकल्प, सिमेंट कारखाने आहे. त्यामुळे येथे मोठ्या प्रमाणात मजूर वर्ग व कमी उत्पन्न गटातील नागरिक वास्तव्यास आहे. बहुतांश नागरिकांकडे पक्की घरे नाही. त्यातच प्रधानमंत्री आवास (शहरी) योजनेमध्ये घुग्घूस नगरपरिषदेचे नाव अद्यापही समाविष्ट करण्यात आले नाही.
त्यामुळे घरकुल योजनेंतर्गत पात्र लाभार्थ्यांना हक्काच्या पक्क्या घरापांसून वंचित राहावे लागत आहे. सद्यस्थितीत नगर परिषद घुग्घूस येथे प्रधानमंत्री आवास योजने अंतर्गत ४५० पेक्षा अधिक लाभार्थ्यांचे ऑफलाइन पद्धतीने नोंदणी करण्यात आली आहे. मात्र ही योजना येथे लागू होत नसल्याने लाभार्थ्यांना योजनेपासून वंचित राहावे लागत आहे. ही बाब लक्षात घेता केंद्र शासनाच्या महत्त्वाच्या प्रधानमंत्री आवास योजनेंतर्गत पात्र लाभार्थ्यांना घरकुल मिळण्यासाठी घुग्घूस नगर परिषदचे नाव प्रधानमंत्री आवास (शहरी) योजनेमध्ये समाविष्ट करण्यात यावे अशी मागणी आ. जोरगेवार यांनी मुख्यमंत्री एकनाथ शिंदे यांना केली. या मागणी संदर्भात आ. जोरगेवार यांची मुख्यमंत्री एकनाथ शिंदे यांच्यासोबत चर्चा झाली असुन या मागणी करिता मुख्यमंत्री यांनी सकारात्मकता दर्शवली आहे.