प्लास्टिक कचऱ्यापासून निर्मित पर्यावरण मुक्त ‘डेमो हाऊस’ चंद्रपूरकरांसाठी तयार
• जिल्हा ग्रामीण विकास यंत्रणेद्वारे भविष्यातील घराचा अभिनव उपक्रम
🖋️ मीडिया वार्ता वृत्तसेवा
📱 8830857351
चंद्रपूर : 26 जून
प्लास्टिक कचरापासून एखादे घर बनू शकते, यावर सहजासहजी कोणी विश्वास ठेवणार नाही. मात्र खरच सिंगल युज प्लास्टीक पासून आपण आपल्या भविष्यातील घर बनवू शकतो, हे जिल्हा ग्रामीण विकास यंत्रणेने अभिनव उपक्रमातून दाखवून दिले आहे. विसापूर येथील श्रध्देय अटलबिहारी वाजपेयी बॉटनिकल गार्डन येथे प्रधानमंत्री आवास योजनेंतर्गत पर्यावरणमुक्त ‘डेमो हाऊस’ची निर्मिती करण्यात आली आहे.
जिल्हा परिषद चंद्रपूर व रॅग आय अपसायकलिंग कंपनी चंद्रपूर यांच्या संयुक्त विद्यमाने प्रधानमंत्री आवास योजना-ग्रामीण डेमो हाऊस बांधकाम अंतर्गत भविष्यातील घर बांधले गेले आहे.
पर्यावरणयुक्त असे डेमो हाऊसची संकल्पना जिल्ह्याचे पालकमंत्री सुधीर मुनगंटीवार, जिल्हाधिकारी विनय गौडा व जिल्हा परिषदेचे मुख्य कार्यकारी अधिकारी विवेक जॉन्सन यांचे वतीने करण्यात आली आहे. त्याकरिता वन विभागाकडून बॉटनिकल गार्डन मध्ये 625 चौरस फुट जागा उपलब्ध करून देण्यात आली. जिल्हा ग्रामीण विकास यंत्रणा चंद्रपूर व डॉ. बालमुकुंद पालीवाल यांचे रॅग आय अपसायकलिंग कंपनी यांच्या संयुक्त विद्यमाने डेमो हाऊस तयार करणात आले आहे. भविष्यात सिंगल युज प्लास्टिक पासून घरे बांधकाम करण्याचे आवाहन जिल्हा ग्रामीण विकास यंत्रणेचे प्रकल्प संचालक डॉ. सुभाष पवार यांनी केले आहे.
=== ==
13 टन सिंगल युज प्लास्टिकचा वापर
19 फुट उंच व 10 फुट बाजुच्या भिंतीसह 625 चौरस फुट क्षेत्रफळावर बांधकाम करण्यात आले असून, 13 टन सिंगल युज फेकून दिलेले प्लास्टिक अपसायकल करून हे बांधकाम करण्यात आले आहे. भिंतीपासून छतापर्यंतची संपूर्ण रचना सर्व प्रकारच्या अपसायकल प्लास्टिक सामग्रीचा वापर करून तयार केली आहे. अपसायकलींग केलेल्या प्लास्टिक तंतुपासुन बनविलेले उच्च गुणवत्तेचे इन्सुलेशन साहित्य इष्टतम तापमान नियमन राखते. घरातील वातावरण गरम-थंड करण्यासाठी ऊर्जेचा वापर कमी करते.
