वडाळा बुद्ध विहार मुक्तीचा ऐतिहासिक विजय
मुंबई: वडाळा, मुंबई येथील संयुक्त एकजूट गृहनिर्माण सोसायटीजवळ, डॉ. बाबासाहेब आंबेडकर कॉलेज परिसरात गेल्या तीन वर्षांपासून बंदिस्त असलेले बुद्ध विहार भीमसैनिक संघटनेच्या अथक प्रयत्नांद्वारे धम्म बांधवांसाठी पुनःश्च खुले करण्यात आले आहे.
स्थानिक धम्म बांधवांच्या लेखी निवेदनानुसार, काही असामाजिक तत्त्वांनी दडपशाहीचा अवलंब करत बुद्ध विहारावर अनधिकृत ताबा मिळवून त्यास टाळे ठोकले होते. यामुळे धम्म बांधवांना त्यांच्या पवित्र उपासना स्थळापासून वंचित राहावे लागले. ही बाब भीमसैनिक संघटनेच्या निदर्शनास येताच, संघटनेने तात्काळ पुढाकार घेतला. कायदेशीर मार्गाचा अवलंब करत, स्थानिक पोलीस स्टेशनच्या सहकार्याने टाळे तोडण्यात आले आणि बुद्ध विहार सर्व धम्म बांधवांसाठी मुक्त करण्यात आले.
या यशस्वी प्रयत्नांमुळे स्थानिक नागरिकांनी भीमसैनिक संघटनेच्या पदाधिकाऱ्यांचे हृदयपूर्वक आभार व्यक्त केले. हा विजय धम्माच्या संरक्षणासाठी आणि सामाजिक न्यायासाठी सामूहिक एकजुटीचे महत्त्व अधोरेखित करणारा आहे.
