पालघर जिल्ह्यात आदिवासी समाजाची भव्य बैठक; १४ ऑक्टोबरच्या आंदोलनाची दिशा निश्चित
अरविंद बेंडगा
जिल्हा प्रतिनिधी, पालघर
7798185755
पालघर :– पालघर जिल्ह्यात आदिवासी समाजाच्या हक्क आणि ओळखीच्या रक्षणासाठी आज सायलेंट रिसॉर्ट, मनोर (टेन नाका) येथे महत्त्वपूर्ण बैठक पार पडली. या बैठकीत जिल्ह्यातील समाजातील विविध घटकांनी सहभागी होऊन आदिवासी समाजाच्या भवितव्यावर निर्णय घेतला.
बैठकीचे अध्यक्ष मा. आमदार श्री. विलास तरे होते. सकाळी ११ वाजता सुरू झालेल्या या बैठकीत जवळपास ६०० ते ७०० माणसं उपस्थित होती. यामध्ये खासदार, पंचायत समिती सदस्य, सरपंच, आदिवासी संघटनांचे पदाधिकारी, शिक्षक संघाचे प्रतिनिधी, यूट्यूब स्टार आणि सोशल मीडियाशी जोडलेले कार्यकर्ते मोठ्या संख्येने सहभागी झाले.
बैठकीत आदिवासी समाजाच्या एकतेला महत्व देण्यात आले आणि समाजातील इतर घटकांकडून सुरू असलेल्या घुसखोरीला थांबवण्यासाठी ठोस निर्णय घेण्यात आला. नेत्यांनी स्पष्ट केले की समाजाची स्वतंत्र ओळख जपण्यासाठी आणि हक्क मिळवण्यासाठी आता आदिवासी एकत्र येत आहेत.
या बैठकीत १४ ऑक्टोबर रोजी होणाऱ्या भव्य आदिवासी आंदोलनाची दिशा निश्चित करण्यात आली. आंदोलन शांततेत, पण ठामपणे पार पाडण्यासाठी कोअर कमिटी तयार करण्यात आली आहे, जी आंदोलनाच्या नियोजनाची आणि मार्गदर्शनाची जबाबदारी पार पाडणार आहे.
सामाजिक एकता आणि ओळख दर्शवण्यासाठी आदिवासी समाजाचा अधिकृत झेंडा, बॅनर, रंग, चिन्ह आणि घोषवाक्य यावर सविस्तर चर्चा करण्यात आली. “आपला झेंडा – आपली ओळख – आपला सन्मान” हा घोषवाक्य ठरवण्यात आला, ज्याद्वारे समाजाने नव्या संघर्षाची दिशा निश्चित केली आहे.
नेत्यांनी सांगितले की १४ ऑक्टोबर रोजीचे आंदोलन केवळ मोर्चा नसून — हे आदिवासी समाजाच्या अस्तित्वाचा आणि सन्मानाचा लढा आहे. या आंदोलनाद्वारे शासन आणि प्रशासनापर्यंत आपला आवाज ठामपणे पोहोचवण्याचा निर्धार सर्व उपस्थितांनी व्यक्त केला.
पालघर जिल्ह्यातील सर्व तालुक्यांमधील कार्यकर्ते, महिला गट, शिक्षक संघ, युवक नेते आणि सामाजिक संघटनांचे प्रतिनिधी मोठ्या संख्येने उपस्थित होते. संपूर्ण सभागृहात एकतेचा आणि जोहारचा नारा घुमत राहिला.
या बैठकीमुळे आदिवासी समाजात नवी उर्जा, आत्मविश्वास आणि एकतेची भावना निर्माण झाली आहे. आता सर्वांची नजर १४ ऑक्टोबर रोजी होणाऱ्या ऐतिहासिक आंदोलनाकडे लागली आहे.
जोहार झिंदाबाद..! जय आदिवासी..!
