नरपड येथे महिला मेळावा व पोषण अभियान उत्साहात पार पडले – महिलांच्या आरोग्य व स्वावलंबनाचा संदेश
अरविंद बेंडगा
पालघर
मो: 7798185755
नरपड :- पालघर जिल्हा परिषद महिला व बालकल्याण विभागाच्या एकात्मिक बालविकास प्रकल्प डहाणू अंतर्गत येणाऱ्या घोलवड १ आणि २ विभागाचा महिला मेळावा व पोषण अभियानाचा कार्यक्रम नरपड येथे वाडवळ सार्वजनिक उत्सव सभागृहात मोठ्या उत्साहात पार पडला. या कार्यक्रमाला सुमारे १०० ते १५० महिलांची उत्स्फूर्त उपस्थिती लाभली.
या कार्यक्रमाला नरपड ग्रामपंचायतीच्या सरपंच श्रीमती चेतना उराड्या, उपसरपंच श्री. गीतेश शेठ, घोलवड ग्रामपंचायतीचे सरपंच श्री. रविंद्र बुजड, एकात्मिक बालविकास प्रकल्प डहाणूचे बालविकास प्रकल्प अधिकारी श्री. सतीश पोळ, तसेच कृषी विज्ञान केंद्राच्या कृषीशास्त्रज्ञ श्रीमती रुपाली देशमुख या मान्यवरांनी उपस्थिती लावली. यावेळी मंडळाचे अध्यक्ष श्री. भावेश राऊत, तंटामुक्ती सदस्य श्रीमती हर्षला राऊत, ज्येष्ठ नागरिक श्री. फकीर सुरती, नरपड ग्रामविस्तार अधिकारी, जिल्हा परिषद शाळेच्या मेरी मॅडम आणि निता मॅडम, तसेच एकात्मिक बालविकास प्रकल्प डहाणूच्या सर्व अंगणवाडी पर्यवेक्षिका उपस्थित होत्या.
कार्यक्रमादरम्यान श्रीमती रुपाली देशमुख यांनी उपस्थित महिलांना आहार, आरोग्य आणि परसबाग या विषयांवर सविस्तर मार्गदर्शन केले. त्यांनी महिलांना संतुलित आहाराचे महत्त्व समजावून सांगत घरच्या घरी पौष्टिक आहार तयार करण्याचे मार्गही दाखवले. घोलवड ग्रामपंचायतीचे सरपंच श्री. रविंद्र बुजड यांनी ‘कन्या आरोग्य केंद्र’ या संकल्पनेची मांडणी करत महिलांच्या आरोग्य आणि सक्षमीकरणावर भर देण्याचे आवाहन केले. बालविकास प्रकल्प अधिकारी श्री. सतीश पोळ यांनी आहाराबरोबरच बालकांचे आरोग्य, मोबाईलच्या वापराचे दुष्परिणाम आणि बालसंवर्धन या विषयांवर महिलांना मार्गदर्शन केले. यावेळी सरपंच श्रीमती चेतना उराड्या यांनीही उपस्थित महिलांना प्रोत्साहन देत समाजातील सक्रिय सहभागाचे आणि शिक्षणाच्या महत्त्वाचे संदेश दिले.
या कार्यक्रमात नरपड ग्रामपंचायत सदस्य श्रीम. काजल काकरा, सामाजिक कार्यकर्ते तथा पत्रकार अरविंद बेंदगा आणि यूट्यूब व्ह्लॉगर आशिक गडग हे विशेष उपस्थित होते. त्यांच्या उपस्थितीने कार्यक्रमाला अधिक उर्जा आणि प्रेरणादायी वातावरण मिळाले.
कार्यक्रमाचे विशेष आकर्षण म्हणजे महिलांसाठी आयोजित पाककृती स्पर्धा. या स्पर्धेमध्ये महिलांनी आपल्या कल्पकतेचा सुंदर परिचय देत पौष्टिक आणि स्वादिष्ट पदार्थ सादर केले. स्पर्धेतील विजेत्या महिलांना प्रमाणपत्रे आणि बक्षिसे प्रदान करण्यात आली. याशिवाय या कार्यक्रमाचे आणखी एक वैशिष्ट्य म्हणजे रानभाज्यांचे प्रदर्शन, पुस्तक प्रदर्शन आणि स्थानिक महिलांनी बनवलेल्या वस्तूंचे स्टॉल्स. या सर्व प्रदर्शनांमुळे स्थानिक उत्पादनांना प्रोत्साहन मिळाले आणि महिलांचा आत्मविश्वास वाढला.
कार्यक्रमाची सुरुवात श्रीमती विशाखा कुलकर्णी यांनी सादर केलेल्या सुंदर ईशस्तवनाने झाली, ज्यामुळे उपस्थित वातावरण भक्तिमय झाले. त्यानंतर घोलवड १ विभाग आणि नरपड अंगणवाडी केंद्रातील बालकांनी “पोषण भी पढाई भी” या पथनाट्याद्वारे अंगणवाडीतील पूर्वप्राथमिक शिक्षणाचे महत्त्व प्रभावीपणे सादर केले. कार्यक्रमाच्या शेवटी नरपड गावातील महिलांनी सादर केलेले तारपा नृत्य आणि लावणी नृत्य यांनी संपूर्ण सभागृहात उत्साह आणि आनंदाचे वातावरण निर्माण केले.
संपूर्ण कार्यक्रमाचे नियोजन व आयोजन घोलवड १ आणि २ विभागाच्या पर्यवेक्षिका श्रीमती मिनल राऊत तसेच दोन्ही विभागातील अंगणवाडी सेविका आणि मदतनीस यांनी अतिशय सुंदररीत्या केले. त्यांच्या समन्वयामुळे कार्यक्रम शिस्तबद्ध आणि यशस्वीपणे पार पडला.
या महिला मेळावा आणि पोषण अभियानाद्वारे महिलांना आरोग्य, आहार, शिक्षण आणि स्वावलंबन याबद्दल मौल्यवान माहिती मिळाली. या उपक्रमामुळे महिलांच्या जीवनात सकारात्मक बदल घडवून आणण्याच्या दिशेने एक महत्त्वाचे पाऊल टाकले गेले आहे.
अशा प्रकारचे उपक्रम ग्रामीण भागातील महिलांना नवचैतन्य देणारे ठरत असून, “सशक्त महिला – सशक्त समाज” हा संदेश या कार्यक्रमातून प्रभावीपणे पोहोचला आहे.
