नागरिकांची गैरसोय टाळण्यासाठी सामान्य प्रशासन विभागाचे परिपत्रक जारी
संदेश साळुंके: राज्यातील शासकीय कार्यालयांमध्ये अधिकारी व कर्मचाऱ्यांच्या जेवणाच्या वेळेबाबत महाराष्ट्र शासनाने महत्त्वपूर्ण निर्णय घेतला आहे. नागरिकांची गैरसोय टाळण्यासाठी सर्व राज्य शासकीय कार्यालयांमध्ये दुपारी **१ ते २ या वेळेत जास्तीत जास्त एक तासाची जेवणाची वेळ** निश्चित करण्यात आली आहे. याबाबत सामान्य प्रशासन विभागाने शासन परिपत्रक जारी केले आहे.
शासनाच्या निदर्शनास आले होते की अनेक शासकीय कार्यालयांमध्ये अधिकारी व कर्मचाऱ्यांच्या जेवणाच्या वेळा निश्चित नसल्यामुळे कामकाजासाठी येणाऱ्या नागरिकांना अनावश्यक प्रतीक्षा करावी लागत होती. काही ठिकाणी संबंधित अधिकारी अथवा कर्मचारी जेवणासाठी गेल्याने जनतेची कामे खोळंबत असल्याच्या तक्रारीही प्राप्त होत होत्या. या पार्श्वभूमीवर शासनाने हा निर्णय घेतला आहे.
परिपत्रकानुसार, सर्व अधिकारी व कर्मचारी एकाच वेळी जेवणासाठी जाणार नाहीत याची दक्षता संबंधित कार्यालय प्रमुखांनी घ्यायची आहे. कार्यालयीन कामकाजावर परिणाम होणार नाही तसेच नागरिकांना सेवा मिळण्यात अडथळे निर्माण होणार नाहीत, यासाठी आवश्यक नियोजन करण्याचे निर्देश देण्यात आले आहेत.
शासनाच्या या निर्णयामुळे शासकीय कार्यालयांतील कामकाज अधिक शिस्तबद्ध होण्यास मदत होणार असून नागरिकांना विविध कामांसाठी कार्यालयांमध्ये ताटकळत बसण्याची वेळ येणार नाही, अशी अपेक्षा व्यक्त केली जात आहे. राज्यातील सर्व शासकीय कार्यालयांनी या सूचनांची तात्काळ अंमलबजावणी करावी, असेही परिपत्रकात नमूद करण्यात आले आहे.
