मीडिया वार्ता न्यूज़
नवी मुंबई- म्हशीचे मांस असल्याचे भासवून तशी बनावट कागदपत्रे तयार करून पावणे एमआयडीसीतील अॅग्रो फ्रेश कोल्ड स्टोरेजमध्ये मोठ्या प्रमाणात गाय आणि बैलाचे मांस साठवून ठेवण्यात आल्याचे उघडकीस आले आहे. हा प्रकार उघडकीस आल्यानंतर तुर्भे एमआयडीसी पोलिसांनी हे मांस साठवून ठेवणाऱ्या व्हट्रेक्स अॅग्री प्रोडक्ट्स लि. या कंपनीचे संचालक हेमंत कुमार यांच्यावर फसवणूक तसेच बनावट कागदपत्रे तयार केल्याप्रकरणी गुन्हे दाखल केले आहेत. पोलिसांनी गाय व बैलाचे सुमारे २२ लाख ८५ हजार रुपये किमतीचे मांस जप्त केले असून अद्याप कोणालाही अटक केलेली नाही.
पावणे एमआयडीसीतील अॅग्रो फ्रेश कोल्ड स्टोरेजमध्ये दोन कंटेनरमधून गोमांस असल्याची तक्रार विश्व हिंदू परिषदेचे कार्यकर्ते सुरेश गायकवाड यांनी तुर्भे एमआयडीसी पोलिसांकडे गेल्या आठवड्यात केली होती. पोलिसांनी महापालिकेचे पशु वैद्यकीय अधिकारी डॉ. वैभव झुंजारे यांच्या समक्ष कोल्ड स्टोरेजमध्ये जाऊन त्या ठिकाणी साठवून ठेवलेल्या मांसाची पाहणी केली. कोल्ड स्टोरेजमध्ये ‘अल थाई फ्रेश फ्रोजन बफेलो मीट’ असे इंग्रजीत लिहिलेले प्रत्येकी १८ ते २० किलो मांस असलेले १५ बॉक्स आढळून आले. तसेच, अल अझीज निळ्या रंगामध्ये व ‘फ्रोजन बोनलेस बफेलो मीट’ असे इंग्रजीत लिहिलेल्या ब्रँडचे मांस असलेले २० किलो वजनाचे १००३ बॉक्स, २० किलो वजनाच्या मांसाने भरलेले पांढऱ्या रंगाचे १२०३ प्लेन बॉक्स असे एकूण २२ लाख ८५ हजार ७०० रुपये किमतीचे मांस आढळून आले. पोलिसांनी या मांसासंबंधीच्या कागदपत्रांची तपासणी केली असता, म्हैस या जनावराचे मांस असल्याची कागदपत्रे पोलिसांना सादर करण्यात आली. त्यामुळे पोलिसांनी महापालिकेचे पशु वैद्यकीय अधिकारी डॉ. झुंजारे यांच्या माध्यमातून कोल्ड स्टोरेजमधील मांसाचे सहा वेगवेगळ्या प्रकारचे नमुने ताब्यात घेऊन ते मुंबईत कलिना येथील न्याय सहाय्यक वैज्ञानिक प्रयोगशाळेत तपासणीसाठी पाठवून दिले. कलिना प्रयोगशाळेने या मांसाचे रासायनिक परीक्षण करून त्याचा तपासणी अहवाल पोलिसांना दिला. या अहवालात अल अझीज व अल थाई हे गायीचे, तर अन्य मांसाचे नमुने हे गोवंश जातीचे (बैलाचे) असल्याचे नमूद करण्यात आले आहे. पोलिसांनी कोल्ड स्टोरेजमध्ये ठेवलेले सर्व मांस जप्त केले आहे. या मांसाचे नमुने पुढील तपासणीसाठी दिल्ली येथील प्रयोगशाळेत पाठविण्यात आले असल्याने अद्याप कुणालाही अटक करण्यात आली नसल्याचे पोलिसांनी सांगितले.
