श्रीवर्धनमध्ये विकास फक्त ठेकेदारांचा आणि पुढाऱ्यांचा; प्रमोद घोसाळकर यांचा घणाघात

श्रीवर्धनमध्ये विकास फक्त ठेकेदारांचा आणि पुढाऱ्यांचा;
प्रमोद घोसाळकर यांचा घणाघात

निलेश भुवड
श्रीवर्धन तालुका प्रतिनिधी
मो. 8149679123

श्रीवर्धनमध्ये आजवर झालेला विकास हा ठेकेदार, काही पुढारी आणि प्रशासकीय अधिकाऱ्यांपुरता मर्यादित राहिल्याचा आरोप शिवसेनेचे दक्षिण रायगड जिल्हाप्रमुख प्रमोद घोसाळकर यांनी केला. नामदार भरतशेठ गोगावले यांना पालकमंत्रीपदापासून वगळण्यात आल्यामुळे महायुतीमध्ये असंतोष निर्माण झाला असून, या परिस्थितीसाठी खासदार सुनील तटकरे जबाबदार असल्याचेही त्यांनी नमूद केले.
शुक्रवार, दि. २१ रोजी दुपारी चार वाजता श्रीवर्धन येथे शिवसेना जनसंपर्क कार्यालयाचे उद्घाटन घोसाळकर यांच्या हस्ते करण्यात आले. या प्रसंगी बोलताना त्यांनी सांगितले की, नगरपरिषद निवडणूक २०२५ मध्ये शिवसेना पूर्ण क्षमतेने सहभागी होत असून, शहरात परिवर्तन अटळ आहे. “नगराध्यक्ष आणि नगरसेवक पदांवर शिवसेनेचे प्रतिनिधी निवडून येतील, याबाबत आम्ही आत्मविश्वासी आहोत,” असे त्यांनी स्पष्ट केले.

महायुतीतील समन्वयाबाबत बोलताना घोसाळकर म्हणाले, “लोकसभा व विधानसभा निवडणुकांमध्ये आम्ही महायुती म्हणून तटकरे यांना सहकार्य केले. हे सहकार्य मतदानातही स्पष्ट दिसून आले. तथापि, खासदारांनी युतीचा मूलभूत धर्म पाळला नाही. आघाडी करण्याबाबत शेवटच्या क्षणापर्यंत आश्वासने दिल्यानंतरही प्रत्यक्षात पाठिंबा न दिल्यामुळे आम्हाला स्वतंत्रपणे निवडणुकीला सामोरे जावे लागत आहे.”
तटकरे यांच्याकडून करण्यात येणाऱ्या विकासाच्या दाव्यांना उत्तर देताना घोसाळकर म्हणाले, “श्रीवर्धनमध्ये प्रत्यक्षात कुठलाही ठोस विकास नागरिकांना जाणवलेला नाही. दिसत असलेला विकास हा फक्त ठेकेदार व काही पदाधिकाऱ्यांचा आहे. शिवसेना हा सर्वसामान्य नागरिकांचा पक्ष असून जात-धर्माचा विचार न करता आम्ही सर्वांना न्याय मिळवून देण्यास कटिबद्ध आहोत.”
उद्घाटन कार्यक्रमाला श्रीवर्धन मतदारसंघ संपर्कप्रमुख सचिन पाटेकर, तालुकाप्रमुख सुरेश मिरगळ, उपतालुकाप्रमुख ओमकार शेलार, शहरप्रमुख सावन तवसाळकर, अविनाश कोळंबेकर, प्रितम श्रीवर्धनकर, देवेंद्र भुसाणे, वसंत यादव, गणेश मांजरेकर आदी मान्यवर उपस्थित होते.